Shillong, Nailur 11: Ka All Meghalaya Upper Primary and Secondary Deficit Pattern School Teachers’ Association (AMUPSDPSTA) hynne ka sngi Palei, kala pynlong ia ka jingialang pynkup burom ha State Convention Centre, Shillong, ban ai jingithuh bad jingsngewnguh ia ka sorkar Meghalaya halor ka jingbteng ban ai jingkyrshan bad jingkular ha ka liang ka pule puthi ha ka jylla.
Ia kane ka prokram la wan ban iashimbynta da u Myntri Rangbah ka jylla Conrad K. Sangma kum u Kongsan, ha ka jingdonlang u Myntri ka pule puthi u Rakkam A. Sangma, u MLA ka Salmanpara Constituency u Ian Botham K. Sangma, u Nongaibuit ka pule puthi u Bah Himalaya Shangpliang bad kiwei kiwei.
Haba ai jingkren ha ka jingialang, u Myntri Rangbah ula pynpaw ka jingsngewnguh ia ka Association kaba la pynlong ia kane ka prokram pynkup burom bad ula ong ba watla ki nongialam bad ki ophisar kim ju khmih lynti ban ioh ia ka jingkhublei ha ka jingshakri ia ka jingkitkhlieh, ka jingai jingithuh kaba la pyni da ki nonghikai ka long kaei kaei kaba ktah bha. Ula ai khublei ia ki nongpyniaid halor ka jingpynwnadur ia kane ka prokram ba la pynlong ia ka, da kaba ioh bha ia ka jingphaikhmat bad kaba bniah ban ia ki prorkam kiba la pynlong da ka sorkar.
U Myntri Rangbah ula kubur ia ki jingeh kiba bun kiba la mad ha ka liang ka pule puthi, da kaba kdew ba ki jingeh kidei kiba la hiar pateng bad kila sahteng la bun phew snem.
Ula iaroh ia ka association ha kaban pyni ia ki jingeh bad ia ki lad ban pynbeit ia ki ha ka lynti kaba tei, kaba lah ban urlong lyngba ka jingiakren, jingiaishah bad kaba jingiatreilang.
Ula pynshai ia ka jingieid bad ka jingbat skhem ia ka kular jong u Myntri ka pule puthi bad u Commissioner & Secretary, kiba la jied hi ban trei ha kane ka bynta namar ka jingaiti ka jongki ban kyntiew ia ka. Ula banjur ba ka pule puthi kadei kawei na ki tnad kaba jynjar bha, ba ka jingktah jong ka rai kaba shim mynta kadei kaba la iohi hadien katno snem bad ula pynthikna ba ka sorkar kan bteng ban wad ia ki lad ban pynbeit kaban ai jingmyntoi ia ki nonghikai bad ia ki khynnah pule.
Ha kaba iadei bad ki polisi kum ka MEG programme, u Myntri Rangbah ula pynshai ba ka sorkar kam kwah ban pynjari hynrei ban pyndonbynta lang ha ka jingiakren, ban pan ia ki jingpynbha lyngba ka jingiasyllok bad ki skul, nonghikai bad ka imlang sahlang. Ula pynpaw ba ka thong hi kam dei tang ban pynbha iaka jingpass ki khynnah hynrei ban saindur ba kin long ki nongshong shnong kiba don ia ka jingkitkhlieh kiba lah ban noh synniang bha ia ka imlang sahlang.
Ula pynpaw ia ka jingshem shimet ka jongu bad pynkynmaw kumno u kpa jongu uba la khlad noh udei unonghikai, uba la ai mynsiem ia u ha ka jingaiti ia la ka jingim sha ka pule puthi. Ula pynpaw ia ka jingiohi jngai ban pynlong ia ka Meghalaya kum ka jylla kaba wan shakhmat ha ka ri, ha kaba ka pule puthi kan long kum u kongsnam jong ka jingangnud.
Ula ong ba kane ka jingpynkup burom kadei ka khyllipmat kaba phylla, ha kaba la pynpaw ia ka jingsngewnguh khlem da don kano kano ka jingdawa ne ka jingai ia ka dorkhas bad kane ka pyni ia ka jingaiti lut jong ki nonghikai ha ka pule puthi.
Ula pynthikna ba ka sorkar kan iai bteng ban ai jingkyrshan bad ban iatreilang ha kaban tei ia ka pule puthi kaba khlain ha Meghalaya.
Katba u Rakkam A. Sangma ula pynpaw ia ka jingsngewnguh ia ki nongialam jong ka association bad iaroh ia ka jingtrei met bad mynsiem bad ka jingiaishah kaba la ialam ia ki nonghikai haduh kane ka khyllipmat kaban sah nam ha ka histori.
 hynne ka sngi Palei, kala pynlong ia ka jingialang pynkup burom ha State Convention Centre, Shillong, ban ai jingithuh bad jingsngewnguh ia ka sorkar Meghalaya halor ka jingbteng ban ai jingkyrshan bad jingkular ha ka liang ka pule puthi ha ka jylla.){kind=link}