Shillong, Nailur 12: Ka Sorkar Jylla hynne ka sngi nyngkong, kala thung da ka jingtohkit Magistrate bad ka jingtohkit ba laitluid halor ka jinglait phet ki 6 ngut ki Koidi na Jowai District Jail ba kynthup ia u snar pyniap briew u I Love You Talang.
Haba wanrah ia ka suo moto statement hapoh ka Iingdorbar,u Myntri kam Pohiing ka Jylla ma Lahkmen Rymbui ula ong “U District Magistrate PK Boro ula bthah ia u Additional District Magistrate ka West Jaintia Hills PK Boro ban pynlong ia ka magisterial inquiry halor kane ka jinglait phet ki koidi”.
U Myntri ula pyntip ba la bthah ruh ia u Additional Superintendent of Police ka West Jaintia Hills District, ban pynlong ia ka jingtohkit ba laitluid halor ki daw bad kiei kiba jia kaba lam sha ka jinglait phet kine ki koidi.
La thung ruh ia u MA Challan, Additional District Magistrate ban pynlong ia ka post mortem ia ki saw tylli ki metiap jong ki koidi ba shah bomiap hynnin ka sngi U Blei ha Shangpung.
Kane ka rai kala mih tang shisngi hadien ba 4 ngut na ki 6 ngut ki Koidi kila shah bomiap ha ki paidbhur ha kawei ka jaka khlaw ba marjan ka shnong Shangpung, West Jaintia Hills.
Hynnin ka sngi U Blei, ki paidbhur ba don kumba 5000 ngut na ki shnong bapher bapher kila kthong ia kine ki koidi bad ioh bat ia ki hapoh kawei ka jaka khlaw ba marjan ka shong Shangpung.
U Ma Lahkmen u ong ba halor ka jingioh jingtip, ka kynhun ki Pulit kila leit sha katei ka jaka ba jia hynrei kim shym la lah satia ban tem ne khang ia ki paidbhur ba kin shim ia ka jingim jong kine ki koidi.
“Ka Kynhun Pulit kila pyrshang ban iakren bad pynjai jai ia ki paidbhur hynrei ha kala poi pynban sha ka jingiapyni bor haduh ba bun ki Pulit ruh kila mynsaw. Ka kynhun ki Pulit kala ioh ban shimti bad rah noh ia ki ki 4 ngut ki koidi ba mynsaw jur na kane ka jaka sha Civil Hospital da ka jingai jingbit jong u Magistrate ba don lang” ula ong.
“Hynrei, haba poi ha Hospital, u Medical Officer ula pynbna ba baroh saw ngut ki koidi kila iap shuwa ban poi ha kane ka jaka sumar” ula bynrap.
Kine ki saw ngut ki koidi ba shah bomiap ki dei u I Love You Talang ba na ka shnong Moorap, u Lodestar Tang ban a Mootyrshiah, u Shidorki Dkhar na Thangrain bad u Marsanki Tariang ba na ka shnong Priang. Ia kine ki saw tylli ki metiap la buh ha ka jaka buh metiap jong ka Civil Hospital, Ialong.
U Koidi uba lait phet na ka kti ki paidbhur u dei u Ramesh Dkhar ba na Mihmyntdu bad uwei pat u koidi u bym iadonlang ha kane ka jingjia u dei u Rikmenlang Lamare ba na Barato. Ia kine ki arngut ym pat shym la lap dien satia shano ba ki don hynrei ki Pulit ki dang pynlong ia ka jingthwet kaba jur, ong u Myntri.
Shuwa kane, u Myntri ula pyntip ba ka Tnad Prison kala register da ka criminal case pyrshah ia san ngut ki Nongtrei jong kane ka phatok ba kynthup ia u Rajesh Swer (Head Warden), Champmilan Kynjing (Warder), Damelahun Sun (Temporary Warder), Pyndaphor Bamon (Warder) bad u Alexier Lawtam (Temporary Warder) namar kane ka jingleit phet kine ki koidi na ka phatok.
Ha ka jingtohkit ba dang shu iaid malu mala la lap ba kane ka District Jail ka dei kaba la phiah haduh lai bynta ki jingai jingpahara ha kaba ia ka bynta ba nyngkong la peit da ki kynhun ka 6th MLA BN bad ia ka ba-ar bad ba-lai la khmih da ki Nongtrei jong ka Tnad. Baroh kine ki koidi ki dei kiba hap ha ka jingpeit ki Nongtrei ka thanad.
U Ma Lahkmen ula ong ba ha ka por kumba 1.45 eiei jong ka 10 tarik Nailur 2022, u Warden ula leit rung ha ka khyrdop jong kane ka bynta ba lai hynrei ula shah thombor da kine ki koidi kiba la plie jubor ia ka khyrdop ba 2 bad ba 3 da kaba thombor ruh ia ki nongap pahara.
Haba poi ha ka khyrdop ba nyngkong kaba la khmih da ki Pulit ka 6th MLA Bn, kine ki Pulit kila pyrshang ban khang ia kane ka jingphet tuh da kaba siat sha suin, hynrei ula shah tied pynban da ki kynja tiar ba nep naka khlieh bad ula shah thom da ka bor.
U Myntri u pyntip ba ha kane ka jingjia, 4 ngut ki Nongtrei ka phatok bad uwei u Pulit, kila mynsaw bad napdeng kine, u Pulit ula poi shah sumar sha Hospital.
Hadien kane ka jinglait phet, la pyntip ia kane ka jingjia sha baroh ki Pulit jong ka District bad kila pynlong ia ka jingiathwet ha kylleng ki jaka.
