Shillong, Nailur 09 : U Symbud Myntri Rangbah ka Tnad kam Pohiing (Police) Bah Prestone Tynsong, ula bthah ia ka Tnad Pulit ban leh da kaba tyngeh pyrshah ia kino kino ki briew, kiba pyndonkam bakla ia ki bor jong ka Sorkar khlem da ioh ia ka jingbit.
“Ngi la ai ka jingbthah ia ka Police Headquarter bad kumjuh ruh ia ki SP ba kin wad ia baroh ki briew, kiba pyndonkam beain, la ka dei ka jingtah iitiong lane pyndait siren lane kano kano ka bym iaid kat kum ki kyndon bala buh da ka Sorkar” ong u Bah Prestone haba iakren bad ki nongthoh khubor ha ka sngi Ba-ar.
Kane ka jingkren jong u kala mih hadien ka jingiohkem dang shen ia ki briew kiba kam ialade kum ki briew ka ain bad ioh kurup ia ki suloi airgun na ki.
Halor ka jingkam ba uwei na kine kiba shah kem u lah ban iakhun ia ka elekshon, u Symbud Myntri Rangbah ula pynpaw ia ka jingartatien, haba ong ba um ngeit satia ia kane ka jingkam bad ba um tip ruh ia kaei ka tyllong.
“Ngam tip nangno phi ioh ia kane ka khubor. Nga dangpyrshang ban kylli na ki paralok riewsain pyrthei la ki iajan ne em bad une u briew hynrei ym don ba tip ia kata. Namar kata, ban shu pynkut ia kane ka jingkam da mano mano hi ngam don jingtip. Hynrei kaei kaba mut ban ong ha phi ka long ba kam pher phi iajan bad u A, B, C ne D kiba don ha ka bor, hynrei phi hap ban iaid kat kum ki kyndon bala buh ha ki rules” ula ong.
 Bah Prestone Tynsong, ula bthah ia ka Tnad Pulit ban leh da kaba tyngeh pyrshah ia kino kino ki briew, kiba pyndonkam bakla ia ki bor jong ka Sorkar khlem da ioh ia ka jingbit.){kind=link}