Shillong, Nailur 4: U Kyrtong ka UDP ha ka elekshon MLA ba la dep na Mawryngkneng bad u Kyrtong shimet ha ka elekshon MDC Dr OS Jyrwa ula kynnoh ba ka seng Voice of the People Party (VPP) kaba ialam ia ka Executive Committee ha Khasi Hills Autonomous District Council (KHADC) kala iuhroit ia ka bor jong ki jaka synshar khaddar tynrai da kaba wanrah thymmai ia ka ain kaba iadei bad ka khyndew ka shyiap.
Haba ialap elekshon na ka bynta u kyrtong ka NPP uba iakhun ia ka elekshon shiteng samoi jong ka MP Lok Sabha u Dr DRL Nonglait ha Mawryngkneng hynne ka sngi Thohdieng, u Dr Jyrwa ula ong, ka jingtyrwa ia ka Land Bill bad Land Ceiling Act kadei da ka jingthmu ban iuhroit bad buh sharud noh ia ki Rangbah Shnong, Dorbar Raid bad Dorbar Hima.
“Haba ngi kylli balei kila weng ia ki Rangbah Shnong, Dorbar Raid, Dorbar Hima, kila ong ba um donkam shuh lada kila pyntreikam ia ka Land Ceiling Act namar ba yn pyntreikam beit noh da ka District Council,” ula ong ha ka jingialang paitbah.
U Bah Jyrwa ula kdew ia ka Clause 16, ba lah dep ban pynduh noh ia ka jingiasyllok bad ki khlieh nongsynshar.
“Kumno phin ong, ba phim shim la pynduhbor haba phi lah dep ban weng noh ia ka Clause 16? Katei ka kyndon kala dep kren shai ba lada pyntreikam ia ka Land Ceiling Act kadei ban don ka jingiasyllok bad ki nongialam shnong, hynrei kine kila kwah ban iaid lait noh ia katei” ula ong.
Ula ong, man la ki shnong ki don ia la ka rukom synshar khaddar tynrai kumta kam long kaba lah satia ban shu pynjari lut kumjuh da kawei ka ain.
“Ha Mawryngkneng, ka lah don lypa kawei ka kyndon ain ba ka jingdie jaka sha ki briew kiba nabar kadei kaba yn ym shah satia. Kane kadei ka rukom synshar khaddar tynrai ka shnong. Ka jaka kadei jong ka shnong, Raid bad Hima, hynrei ki, kin ialeh ban knieh jubor ia kane ka jinglongtrai. Kane ka long kaba bakla jur” ula ong.
U Dr Jyrwa ula kynthoh tyngeh ruh ia ka seng VPP kaba la kular shwa ka elekshon ban weng noh ia ki Toll Gate ne ki khyrdop lum khajna.
“Hashwa ka elekshon MDC, kila ong ba yn ym don shuh ki khyrdop lum khajna lada ki wan ha ka bor. Mynta ki lah don ha ka bor hynrei ki khyrdop lum khajna kila nang bun. Kito kiba ngi lah jied kila kylla long ki nonglum ha kitei ki khyrdop” ula kynnoh.
Da kaba ong, ba ka elekshon MP kadei ka kabu ban ai ia ka rai pyrshah ia ka jingialam hapoh ka KHADC” u Bah Jyrwa ula ong, “Ha ka kam synshar paitbah, ka bor ka shong ha ki paitbah. Phi long halor eh, phi dei ki nongthep vote, phi ai ia ka bor bad phi knieh noh ia ka bor”.
Haba pynshai halor ka jingkynnoh ba lah shu siew da ka pisa ia ki paitbah ban iashimbynta ha ki jingialang jong ka NPP, ula ong, “Lada kam don ka mynsiem, wat lada phi ai pisa ruh, ngan ym wan sha ka jingialang. Ki paitbah ka Mawryngkneng kila wan kadei namar ba ki ieid ia u Dr Nonglait.”
U CEM barim ka KHADC u Bah Pyniaid Sing Syiem, ula banjur ia ka jingdonkam ban jied ia u MP uba lah ban iada ia ka hok jong ka jaidbynriew riewlum hapoh Parliament.
U Bah Syiem ula pynkynmaw ba kumno ki nongialam riewlum kila lah ban pynioh ia ka Sixth Schedule ha u snem 1950 watla kam shim la don satia kano kano ka jingiada ha ka riti synshar ka ri ha kitei ki por.
“Da ka jingtrei shitom bad ka jinglong nongialam jong ki rangbah, kila lah ban pynrung ia ka Sixth Schedule ha ka Constitution ne ka riti synshar ka ri” ula ong.
Ula ong ba ia ka District Council la thaw ha u snem 1952 ban iada ia ka khyndew ka shyiap, kolshor bad ia ka jingsynshar khaddar tynrai, hynrei ban pynkhlain ia ki kala shim por bha da ki phew snem.
“Ngi don ia ki District Council kiba la palat ia ka 70 snem, hynrei ngi lah ioh ia ki aiñ tang ha ki khyndiat snem namar ba ngi don ia ki briew kiba kum u Bah Sniawbhalang Dhar ha ka Sorkar Jylla uba lah iarap ban pynioh jingmynjur ia ki aiñ jong ka District Council” ong u Bah Syiem.
Ha kaba iadei bad ka jingtyrwa ia ka 125th Constitution Amendment Bill kaba don ia ka jingsngewkhia ha kaba iadei bad ka Sixth Schedule, u Bah Syiem ula ong, mynta ka don ha ka Tnad Kam Pohiing ka Ri hadien ba lah dep ban khmih bniah da ka Standing Parliamentary Committee.
“Ka rai na ka bynta ka jaidbynriew ka don ha Delhi kumno ban rai ha kaba iadei bad ka Sixth Schedule bad ki District Council. Ngi donkam ia u MP, kaba ka Parliament ne iingdorbar thawain kan sngap. Ngim dei ban jied ia uno uno ban leit ban shong ha kyndong jong ka Parliament” ula ong.
“U Dr Nonglait u long uba biang na kiba biang tam eh ban leit sha Parliament” ong u Bah Syiem ha ryngkat bad ka pan ia ka jingkyrshan na ki paitbah na ka bynta u kyrtong ka NPP.
