Shillong, Nailur 09 : U Symbud Myntri Rangbah ba khmih ia ka kam pohiing Bah Prestone Tynsong ha ka sngi Ba-ar, ula pynthikna ba ka sorkar jylla kala shimkhia ia ka jingjah klep jong ka khynnah ba dang 6 snem na ka shnong Upper Rajasimla ha North Garo Hills district.
“Kane ka jingjia ka dang bteng ban long kaba lah shimkhia bha bad la pyrshang ha baroh ki liang ban ioh ban wan ialam biang ia kane ka khynnah sha ka longiing longsem ka jongka bad ban pynthikna ban ai ia ka jingbishar kaba hok” ong u Bah Tynsong haba jubab ia ka zero hour notice kaba la wanrah da u MLA ka Kharkutta u Rupert Momin hapoh ka iingdorbar thawain ka jylla.
Ula pyntip ba ki pulit bad ki kynhun bapher kila trei khlem shongthait ban lap ia kane ka khynnah bad ban tih tynrai ruh ia ki daw halor kaj ingjah klep ka jongka.
Kane ka khynnah kynthei kala jah ha ka 18 tarik u Naitung ha ka por 1:30 mynsngi, katba ki kmie ki kpa ki jongka ki dang leit trei hapoh jongka MGNREGA scheme.
La ujor ia ka ejahar halor ka jingjah briew da u kpa jong kane ka kynthei hapoh ka Kharkutta Police Station bad la sdang ia ka jingtohkit.
Ki pulit ryngkat bad ki kynhun ki bapher bad ki shnong ki thaw, kila leit ban wad ha kylleng ki jaka ia kane ka khynnah rit.
Bun tylli ki kynhun naduha ka Special Force, Search and Rescue Team, Fire and Emergency Services bad ka K9 unit, la buh ha katei ka thain. La pyndonkam ruh ia ki Drones ban wad ha ki jaka riat kiba eh ban poi.
U Symbud Myntri Ragbah ula ong ba uwei u briew ula shah kem ha kaba iadei bad katei ka jingjia bad ki dang iaid shakhamat ban buddien ia ki jinglap ksai.
“Kum shi bynta jong ka jingtohkit. La lap ksai la buddien bha kynthup ia ka jinglah ban don kti da ki briew kiba nabar. Ki pulit kila iatreilang ruh bad ki pulit kaAssam ban pynshisha ia ki jingtip kiba ki ioh, kynthup ia ka jingwad bniah bad ki nongdie ia ki mar jot bad kiwei kiwei kiba suba jur. Uwei u riewshimet ula shah kem ha kaba iadei bad kane ka jingjia. Katba katto katne ki riewshimet kila shah khmih bniah, ym shim la ioh satia ia ki sabut kiba paka” ula ong bad ka pynpaw ia ka jingsngewkhia ba watla bun ki kynhun bad ka jingiatreilang bad kiwei pat ki jylla ym shim la lapksai ia kane ka khynnah kaba la jah haduh mynta bad kane ka kam mynta ka dang don hapdeng ka jingtohkit.
“Ki pulit kila trei shitom ban lum ia ki sabut bad ia ki sakhi satar, ban lapksai bad ban ioh pynbeit noh ia kane ka jingjia kaba la pynklumar ia ka jingmut jingpyrkhat” ong u Bah Prestone.
