Shillong, Nailur 09 : Ka Sorkar Jylla kala pynbna ia ka jingthmu ban shna ia ka surok Eastern Bypass na Sohryngkham sha Mawshbuit bad Mawlynrei, da ka jingthmu ban lah pynduna ia ka jingkhapngiah ka sor Shillong.
Kane ka surok ba 9.95 Km kan pynlah ia ki kali kamai ba kin iaid lait noh ia ka sor, ka ban pynduna shibun eh ia ka jingdheng kali.
Haba jubab ia ka jingkylli bala wanrah da u MLA ka VPP na Mawryngkneng Bah Heavingstone Kharpran ha Iingdorbar ha ka sngi Ba-ar, u Symbud Myntri Rangbah ba khmih iaka Tnad PWD (Roads) Bah Prestone Tynsong ula ong ba kane ka project ka dei shibynta na ki lynti ban weng shi syndon ia ki jingeh kiba ju mihha ka surok na Mawshbuit sha Happy Valley.
Ka 58 Gorha Training Centre (GTC) kala pynieng ia ka khyrdop hapdeng jong kane ka surok, kaba ktah jur ia ka leit ka wan jong ki nongshongshnong ka shnong Mawshbuit.
U Bah Prestone ula pyntip ba ka Sorkar kala ioh ia ka gift deed na ki bor Shnong, kiba tyrwa ia ka jaka ban shna ia kane ka surok ba thymmai.
“Ngi la dep pynlong ia ka sorjamin ba malu mala bad ka jingjngai na Mawshbuit sha Mawlynrei ka long 4 Km. Hynrei, 300 meter jong kane ka surok ka hap hapoh ka jaka shipai. Ngi la iakren ia ki bor shipai ban pynthikna ba ngin lah ban pyniaid lynti na kane ka jaka ha kaban shna ia kane ka surok” ula ong.
“Nga kyrpad ia u MLA (na Mawryngkneng) ban iadon bynta lang ha kane. Sa shisien na Sohryngkham sha Mawshbuit lada ngi ioh jaka bad na Mawshbuit sha Mawlynrei, ia kane ngin khot ka Eastern Bypass” ong u Bah Prestone haba bynrap ba ynda la pyndep ia kane ka surok, ki kali kali kin ym donkam shuh ban rung sha Shillong bad kane kan iarap bha ban pynduna ia ka jingkhapngiah ka sor” ong u Symbud Myntri rangbah haba bynrap “Ngi mut shisha bad ngi don hangne ban wanrah ia ka jingpynbeit kaban neh shirta bad nga thikna ba ngin lah ban pynbeit ia kane ka kam”.
Haba iadei bad ka surok ba 600 meter na Mawshbuit sha Happy Valley, kaba hap hapoh ka jingkhmih ki bor shipai, u Symbud Myntri Rangbah ula ong ba ka Sorkar kan sa iakren ia kane ka kam bad ki bor shipai ba kin maramot ia ka surok, kaba la sniew bha mynta.
“Lada ki bor shipai kim long kiba kloi ban maramot, ka Sorkar Jylla ka long kaba la pynkhreh ban leh hi” ula ong haba bynrap ba shen ka Sorkar kan sa ioh ia ka no-objection certificate (NOC) na ki bor shipai ban maramot ia kane ka surok ba 600 meter.
U Bah Prestone ula ong ruh ba ka Sorkar kala mut hok shisha ban wad ia ki lad ki lynti ban lah pynbeit syndon ia kane ka jingeh, haba pynthikna ba ka shnong Mawshbuit kan nym mad shuh ia ki jingeh ba iadei bad ka surok.
