Tura, Nailur 07 : Ka Iingkashari Session Judge ka South Garo Hills, kala rai pynrem ia saw ngut ki briew kiba rung beain sha India khlem ki kot ki sla bad phah set phatok ia ki hapoh ka Foreigners Act, 1946.
Ha ka mukotduma ba nynkong (Gasuapara PS Case No. 03/2025), bala tohkit da u SI Rush T.Sangma, la chargesheet ha ka 6 tarik Jymmang 2025. Hadien ka jingbishar ia kane ka mukotduma State of Meghalaya vs. Nazir Miah, Shuyal Miah, bad Faysal Miah, u Sessions Judge Febroneous Silkam Sangma ula shem ia kine ki lain gut ba ki pynkhein ia ka kyndon 14A(b) jong ka Foreigners Act.
Ia kine la phah set phatok arsnem bad ka kuna T.20,000 nalor arbnai lada kim lah siew ia ka kuna.
Ha kawei pat ka mukotduma (Baghmara PS Case No. 03/2025), la chargesheet ha ka 31 tarik Jymmang, 2025. U nongshah kynnoh, Hafikul Islam, ula shah pynngat hapoh ka kyndon 14A (b) jong ka Foreigners Act namar ka jingrung beain.
La hukum ban set phatok haduh 2 snem ia une u briew bad ka kuna ba T.10,000 nalor arbnai lada um lah ban siew ia ka kuna.
