Shillong Nailur 05: U Dr. Heipor Uni Bang, Principal bad u Nongseng jongka KB Memorial Secondary School, East Jaintia Hills, Meghalaya, ula shah pynkup burom da ka khusnam National Teachers’ Award 2025 mynta ka sngi.
Ula long napdeng ki 45 ngut ki nonghikai na kylleng ka ri India kiba la shah pynkup burom ha ka President Droupadi Murmu ha Vigyan Bhawan, New Delhi, ha ka jingrakhe ia ka Sngi Kyrpang ki Nonghikai.
Ka jingithuh ia u Dr. Bang ka pyni ia ka jingaiti jongu ha ka pule puthi, ka jingwad bniah ha kaba iadei bad ka mariang bad ka jingshakri ia ka imlang sahlang. U riewstad uba la tbit bha ha ka jingpule, u la pyndep ia ka PhD jong u ha ka Environmental Management na ka William Carey University, Nongmensong, da ka jingthoh halor “Ki jingeh bad ki lad ki lynti jong ka jingpynkhuid ia ki jaboh jabaiñ jong ka East Jaintia Hills District jong ka Jylla Meghalaya.”
Ula thoh bun ki kot wad bniah, kynthup ïa kiba la pynmih ha ka International Journal of Research Education and Scientific Methods (2021) bad ka International Journal of Ecology and Environmental Science (2020) bad ula thoh ruh ia ki kot pule ha ka ktien Khasi ba la hikai haduh ka klas IV bad u ju pynthymmai man ka por ia ki kot jingtip kyllum jong ka skul jongu ban kynthup ia ki jingtip shaphang ki kam jong ka distrik bad ka jylla.
U Dr. Bang ula sdang ïa ka kam hikai ha u snem 2009 hadien ba ula pyndep ïa ka MSc ha ka Botany na ka North-Eastern Hill University (NEHU) bad ula hikai ha ka skul Little Flower Secondary School, Khliehriat bad ha Rymbai Presbyterian Higher Secondary School hashwa ban seng ia ka KB Memorial Secondary School ha u snem 2013 kum ban pynbiang ia ka jingdawa ha ka imlang sahlang ban ioh ia ka skul phareng kaba jem dor.
Hapoh ka jingïalam jongu, ka skul ka la kiew ha ka pule puthi, ki kam ïalehkai, bad ki kam ba iadei bad ka kolshor, da kaba wan ba ar ha ka State Subroto Mukherjee Cup (Uder-14 Boys) ha u snem 2023 bad 2025 bad kala wan ha ki kyrdan ba hakhmat eh ha ki jingïakob ha ka kyrdan distrik, kynthup ki jingïakob kyntip, ki jingiatai nia, ki jingthoh essay bad ki prokram ba iadei bad ka kolshor hapdeng u snem 2020 bad 2025.
Nalor ka kamram jong u kum u nonghikai, u Dr. Bang ula noh synniang sha ka roi ka par ha ka imlang sahlang, ula trei kum u dkhot jong ka Juvenile Justice Board, Khliehriat, u dkhot jong ka Red Cross Society ha u snem 2015–2016, bad kum u nonghikai ha Thomas Jones Synod College, Jowai, hapdeng u snem 2014 bad 2017. U la wanrah ruh ia ki rukom hikai kiba thymmai, kynthup ia ka rukom hikai bapher, kaba pynshlur ia ki khynnah pule ban long ki nongpule ba laitluid bad kyntiew ia ka jingiadei kaba kham ha ka kamra pule lyngba ki jingiakren ban pynbeit ia ki jingeh.
Haba pynpaw ka jingsngewnguh ïa ka jingpynkup burom jong ka ri, u Dr. Bang ula ong, “Kane ka khusnam ka dei ka jingithuh ïa ka jingtreilang jong ka ïing ka sem jong nga, ki paralok ba iatreilang bad nga, bad ki tnad pule puthi jong ka distrik bad ka jylla. Nga sngewnguh eh ïa U Blei uba la ïalam ïa nga ban jied ïa ka kam hikai kum ka kam bad ban shakri ïa ka imlang sahlang ha la ka jong ka rukom kaba rit.”
Kum u nongpynbiang ia ka jinghikai, ula buh ruh ia ki jingai jingmut kiba kongsan ban pynkhlain ia ka rukom hikai bad ula kyrpad ban ai jingkyrshan pisa ia ki skul shimet kiba noh synniang shibun sha ka pule puthi, khamtam ha ka dur jong ki grant-in-aid na ka bynta ban kyntiew ia ki jingdon jingem bad ka tulop jong ki nonghikai.
Ula ban jur ruh halor ka jingdonkam ban pyntreikam pura ïa ka National Education Policy (NEP), ban kynthup ïa ka ktien Khasi ha ka Khyrnit ba phra jong ka Riti Synshar, bad ban pynkhlaiñ ka jingkyrshan ïa ki Khynnah ba donkam kyrpang lyngba ki lad jingïarap kiba biang.
Shuh shuh, ula kyntu ia ki sienjam kiba khlain na baroh ki liang ban pynthikna ba ka jingpule kaba bha kan long kaba lah ban ioh ha ki jaka nongkyndong bad kiba kham duna ka ioh ka kot ha ka imlang sahlang.
