Shillong, Nailur 11 : U Aryan Joshi u la ioh ban pynliem noh ia u rangialehkai Table Tennis ba kynsai ka jylla u T Yogesh ha ka lympung ialehkai 1st Meghalaya Open Table Tennis kaba long ha kane ka sngi U Blei ia kaba la pyniaid da ka Table Tennis Academy jong ka Laban Sports Club.
Wat hapdeng ka jingshitom ha ka khohsiew u Joshi u la iakhun tyngeh haduh ba un da lah ban pynliem kdur ia utei u rangialehkai ba la paw.
Ha ka final jong ki kynthei para marwei, ka Wanpyntngenlang Lyngdoh na Nongstoin ka la ioh ban pynliem noh ia ka Camelia Diengdoh ha ka jingiakhun kaba mar ia biang bor bha.
U Kongsan ha kane ka sngi, Bah Sanbor Shullai ba dei ruh u Myntri ka tnad Arts and Culture ka sorkar jylla bad u Chief Patron jong katei ka Club kaba la iaid lynti mynta 116 snem, u la pynpaw iaka jingkmen halor ka jinglah jong ki ban pyniaid ia katei ka lympung ha ka jylla.
“Ka long kaei kaei kaba sngewkmen ban iohi ba ka club ha ka sien kaba nyngkong ka la lah ban pynlong ia ka jingiakhun Table Tennis ha ka jylla,” u la ong. U Myntri u la kular ruh ban iarap 1lak tyngka iaka club na ka bynta ki kam jong ka.
Ha ka jingiakhun ki shynrang ba hapoh 19 snem pat la iohi ia ka jingialehkai kaba shongshit bha hapdeng ki arngut ki khynnah jong ka Academy hynrei hadien ka jingiakhun kaba neh slem u Prashanta Sarmah Bordoloi u ioh ban pynliem salit ia u Labeeb Faisel Ahmed.
Ha ka thup ki shynrang ba hapoh 14 snem u Debobroto Paul u la ioh ban pynliem noh ia u Krishiv Chaudhary.
La pynshongshit ruh ia ka lympung da ka jingdon ki jingiakhun hapdeng kiba la heh rta lane ka Veteran Singles bad Doubles.
Ha kane ka thup ruh, u Nirmalaya Bhattacharjee uba wan naduh Cooch Behar u la shim bynta lang bad khur ruh ia ka nam lahduh d akba pynliem noh ia u Gilbert Sohrun. Nalorkata, u Bhattacharje ryngkat u S Pyngrope ki la ioh ruh ban pynliem ia ka kynhun u RB Das bad Ranjan Dey ha ka Veteran Doubles
Ha katei ka lympung ki bor pyniaid ki la ai ka jingithuh ia u khynnah ba dang 5 snem ka rta u Shriya Thapa bad u RB Das pat uba rangbah tam uba don 72 snem.
