Jirang, Nailur 04 : Ka Myntri ka Koit ka Khiah ka Dr. Mazel Ampareen Lyngdoh, ha ka sngi Palei, kala plie ia ka Aseptic Pulp Processing Unit kaba nyngkong eh hapoh ka jylla, ha Jirang Organic Agro Farmer’s Producer Company Ltd (FPC) kaba don ha Nonglum, New-Jirang, Ri-Bhoi District.
Ha kane ka jingplie la iadonlang u MLA ka Jirang u Bah Sosthenes Sohtun, ka Saloni Verma ka Deputy Secretary, Additional CEO, MEGNOLIA, ED MBMA; u Abhilash Baranwal u Depity Commissioner jongka Ri Bhoi district bad ka Kong Ibalahun Thangkhiew, CEO jongka Jirang Organic Agro FPC.
Une u mawmer u pyni shai ia ka jingiohi jngai jong ka Meghalaya ban wanrah ia ka jingkylla ha ka thain nongkyndong bad ka jingkiew ka thain hapoh ka jingialam u Myntri Rangbah ka jylla u Conrad K. Sangma.
Haba kren ha ka jingialang ka Dr. Mazel Ampareen Lyngdoh, kala ong ba ki nongrep ki long ki mawkordor jong ka jylla Meghalaya. “Ki nongrep ki jong ngi ki long kiba kordor bha ha ka imlang sahlang, khlem ka jingdon ka jong phi baroh, ngin ym lah ban pyndep ia ka iing ka jong ngi. Lada phi trei shitom bad phi don iaka jingskhem jingmut, phi ia treilang, ka sorkar kan ai ia phi ia ki jingdonkam bad kam don kaei kaei ruh kaba ym lah ban kynjoh”.
Kala banjur ba ka jingialang kaba kum ha kane ka sngi, ka pyni ia ka jingkular ka sorkar ban prat lynti ia ki nongrep. Kala pynthikna ba ka sorkar ka long kaba kloi ban ai ia ki jingdonkam na ka bynta ki nongrep bad kala kyntu ba kidei ban mih shakhmat ban pynapw ia ki jingsngew ki jongki bad ia ki jingeh. Kala ong ba ka sorkar kadei kawei kaba sngap ia ka jingdonkam jong ki paidbah.
Ka Dr. Lyngdoh kala pynshlur ia ki nongrep ban shaniah skhem halide, ban trei shitom bad ban kdew ia ka sorkar ha kaban shimkhia mardor ia ka jingdonkam. Kal pynshlur ban sdang ia ka rep kaba khlem pyndonkam dawai bad ban leit phai sha ka rukom rep tynrai kaba la leh da ki longshwa manshwa. Kala kyntu ruh ba ka jingpyndonkam ia ki dawai dashin ha ki jingthung jingtep ka ktah ia ka koit ka khiah bad ia ki pateng ban wan.
Kala ong ba ka Ri Bhoi District kadei ka jaka kaba la kyrkhu da u Blei, kala kyntu ia ki nongrep ba kin noh synniang ia ka bha ka miat bad ia ka ioh ka kot bad kala pynthikna ba ka sorkar kan ieng ryngkat lang bad ki ha kaban ai ia ka jingkyrshan ia ki longiing jong ki nongrep.
Na ka kynhun kaba rit, ka Jirang Organic Agro FPC kala jam shaphrang ha ka khaii pateng ha ka rep ka riang bad sdang ia ka kam Processing bad ka jinglah ban don ia ki lad ban pyniaid ha ki iew ki hat. Kane ka jingkiew shaphrang ka pyni ia ka jingiengskhem ka sorkar ban kyntiew arshah ia ka jingioh kamai ki nongrep bad ban kyntiew ia ka jylla Meghalaya kaba pynmih ia ki marrep kiba kyrpang ban pyniaid iew hapoh ka ri bad Shabar ri.
Ka long ruh ka jingpynshisha ba u Myntri Rangbah ka jylla u Conrad K. Sangma ula buh hakhmat eh ha kaban wanrah ia ka jingpyniasoh kaba khlain bad ki iew ki hat, ban bei tyngka heh ha ka agri-processing bad ban pynkup bor iak I nongrep da ka jingai jinghikai, jingpyndonkam ia ki kor teknoloji bad ka jingai ia ka jingstad bad jingshemphang.
U Bah Sosthenes Sohtun, ula ong, “Kum u MLA jong ka constituency, Ng sngew sarong ban iadonbynta ha kane ka prokram bad ban sakhi ia ka jingplie ia ka Aseptic Pulping Unit bad Mandarin Sorting, Grading, bad Waxing Unit. Nga iaroh ia ka jingtrei kaba khlem shongthait jong ki nongrep ha kaban kyntiew bad rah shajrong ia ka rep ka riang da kaba pyninam ia ki mar kiba la pynmih ym tang ha ki iew kiba don hapoh ka ri hynrei wat shabar ri ruh.
Ka Saloni Verma, kala ong ba ka jingrakhe mynta ka sngi kadei ia ki nongrep jong ka Jirang Organic Agro FPC kaba la sdang ha u snem 2017, kaba la sdang na ka jingsdang kaba rit bad mynta klala don 433 ngut ki nongrep kiba na ki 18 tylli ki shnong ha ka jaka rep kaba 500 hektar.
La sdang da ka jingshalan ia ki katto katne ki marrep bad mynta kala jam shaphrang ban pynkhlain ia ka jingkhaii sha Delhi, Bangalore, Dubai.
Ka Aseptic Pulp Unit kaba nyngkong eh ha Meghalaya
Kane ka aseptic pulp unit, kadei kaba la thaw lyngba ka Community Public Private Partnership (CPPP) model, ha kaba ka shnong ka thaw ka ai iaka jaka bad ia ka jingtreibylla bad ki kynhun shimet ki wanrah ia ka jingbei tyngka, ki kor teknoloji bad ban pyniaid ha ki iew ki hat.
Kane ka sienjam kadei kaba la kyrshan da ka International Fund for Agricultural Development (IFAD) bad ka Farmers’ Collectivization for Upscaling Production and Marketing System (FOCUS) scheme. Ka sorkar jylla ryngkat abd kiwei pat ki prokram kum ka Meghalaya Livelihoods and Access to Markets Project (MLAMP) bad CM FARM+ kala iarap ha kaban tei ia kane ka FPC ha ka jingiaid lynti kaba jop.
U mawmer ka jingjop ba hakhmat eh ka Jirang FPC
Ka jingiaid lynti jong ka Jirang FPC ka long ka jingpynshisha ia ka jingjop ha ka shnong, kaba la sdang na ka Cooperative kaba rit da kaba kamai tang ₹1.5 lak ha u 2017–21 sha ka khaii pateng ha ka rep ka riang kaba la pynmih haduh ₹1.17 Klur ha u Nailar 2025.kaba la kiew kynsan sha ka 77 shah. Ka rukom khaii lyngba ka FPC ka banjur ban kynshew tyngka biang da kaba pynwandur bha bad ban sam kumba 10% na ka jingkamai sha ki dkhot.
Jingkynshew : T.2.46 klur, da ka projected Internal Rate of Return (IRR) kaba 25%.
Ka jinglah pynmih mar : 10 metric ton man la ka sngi bad ka buhthong ban pyniaid haduh 480–600 metric ton ha ka shi snem.
Ki nongrep kiba pyniasoh bad ka FPC mynta kin ioh iaka dor kaba biang lyngba ka kontrak bad ki nongthied kiba pawnam kum ka Lulu Group International for GCC exports, Safal–Mother Dairy, Reliance Retail, Blinkit, Shabri AI bad Earthly Tales bad kane kan kyntiew shibun ia ka ioh ka kot jong ki nongrep.
