Shillong, Nailur 11: Saw ngut na ki hynriew ngut ki Koidi kiba phet tuh na Jowai District Jail, kila shah bom iap ha ki paidbhur ka Shnong Shangpung, West Jaintia Hills, hynne ka janmiet sngi U Blei.
Kane ka jingjia kala jia ha ka por 3 baje eiei haba uwei napdeng kine ki koidi, ula leit sha kawei ka dukan sha ban thied jingbam bad la don ba ithuh ia u da ki katto katne ngut ki briew.
Mar kumta hi, kine ki briew kila pyntip ia ka Shnong bad la poi ka jingiamih paidbah, ong u Rangbah Shnong ka Shangpung Bah R Rabon haba iakren lyngba ka phone.
U iathuh ba ki paidbah kiba la iamih, kila beh kthong ia kine ki koidi sha kawei ka jaka khlaw ba marjan.
Ki video ba la saphriang ha ki rynsan social media, ki pyni ia ki paidbah kiba bat da ki dieng, kila bom ia kine ki koidi khlem ka jingmap.
Saw ngut kine ki koidi kila iap ha ka jingshah bom shnong katba uwei pat ula lait phet, ong u Rangbah Shnong.
U I Love You Talang uba la shah kem ha ka jingpyniap ia u Nongniah Taxi bad Tourist Taxi u dei uwei napdeng kine ki 4 ngut ba shah pyniap. Ia ki lai ngut kiwei pat ym pat lah ban pynthikna ia ka kyrteng.
U Ramesh Dkhar uba donkti ban pyniap ia u Nongniah Taxi na Jowai, u Damehipaia Papeng u dei uba lait phet na ka kti jong ki paidbhur.
Uwei u koidi uba phet lang na Jowai District Jail, um shym la don lang bad kane ka kynhun ha ka por ba jia kane ka jingjia.
Hynnin ka janmiet, hynriew ngut ki koidi kila phet na Jowai District Jail hadien ka jingthombor ia uwei u Pulit pahara.
Kine kiba lait phet ki kynthup ia u Marsanki Tariang, u Rikamenlang Lamare, Shidorki Dkhar bad Lodestar Tang nalor u I Love You bad u Ramesh Dkhar.
