Pyrshah ka JNC ba thmu siew tulop ka Sorkar ia ki nongtrei ADC | Maham ba ap jingma ia ka jinglaitluid

Jowai, Nailur 01 : Ka Jaintia National Council (JNC) kala pynpaw ia ka jingsngew pyrshah kaba jur halor ka rai jong ka Sorkar Jylla ban iarap siew noh ia ka tulop ki nongtrei jong ki Autonomous District Council (ADC) naduh ka 1 tarik Naiwieng haba kdew ba ka lah ban ktah ia ka jingsynshar laitluid bad ka jingdon ia ka pla tyngka kaba shngain.

Ka JNC kala buh jingkylli ruh ia ka nongrim ain halor ka rai jong ka Sorkar bad ong “Kaei ka kynhun jong ka Sixth Schedule kaba aibor ia ka Sorkar ban siew tulop ia ki nongtrei ADC?. Ka Sixth Schedule kam i ba don kino kino ki kyndon ba shah ia ka Sorkar ban siew ia ka tulop ki nongtrei ka Council. Hato kane ka ieng kat kum ka ain? Kaei kaban ktah ia ka jingsynshar laitluid jong ki ADC? Hato kane ka lah mo ban pyntlot ia ka bor jong ki ADC? Hato ka jylla kam shym la dep ban mushlia ia ki kam jong ki ADC lyngba ki briew jong ka? Hato ia ki nongtrei ADC yn niew noh kum ki nongtrei jong ka jylla ne kum ki nongtrei jong ka Council? Hato donkam ia ka jingmynjur jong ka jylla na ka bynta ban thungkam thymmai ha ki ADC? Lada ka jylla ka kitkhlieh ia ka jingsiew tulop, hato kane ka mut ba ki MDC ki la kylla long tang ki briew jong ka jylla?”

Kala buh jingkylli ruh “Hato ia kine ki tulop yn khate na ki khajna ba dei ioh ki ADC kum ki marpoh khyndew, transport bad Forest? Hato ka Jylla ka pynjari ia ka professional tax lane dei ka kamram jong ka ADC? Nangno baka Sorkar Jylla kan sei ia ka pisa ban siew ia ka tulop jong baroh ki lai ADC?.

Haba tyrwa ia ki lad ki lynti ban wanrah ia ka jingshngain ka pla tyngka jong ki ADC, ka JNC kala ong ba ki ADC ki dei ban leh eiei ha kaban pynkhlain ia ka jingpynmih pisa khang ban tehlakam ia ki jingeh ki ban mih hadien habud ha ka rukom pyniaid ia ka pla tyngka. Ki ADC ki dei ruh ban buh da u pud ia ka jingthungkam kat kum ka jingdap pisa.

“Ka Sorkar Jylla ka dei ban ai ia ka jingkhein jingdiah kaba bniah haba iadei bad ka jingioh lum khajna na ki marpoh khyndew, transport bad forest. Ka dei ban kdew shai ba katno ka khajna ka leit sha ki ADC bad katno sha ka Jylla, bad pynthikna ba ki ADC ki ioh ia la ka bhah ha ka por kaba dei” kala ong.