Shillong, Nailar 30 : Ka Khasi Students Union (KSU)-Laban Circle ha ka sngi Thohdieng, kala ioh bat haduh 22 ngut ki bar jylla ba suba dei ki muslim ba wan poi ei na ri Bangladesh, kiba wan shong wan sah beain ha ka thain Laban.
Ia kine ki briew la kyndang hadien ba kim lah satia ban ai ia ki kot ki sla ki ban pynshisha ialade ba ki dei ki nong India, ha ka jingiaid pahara ban bat mynder jong kane ka Seng ha Laban.
Ha kane ka jingkhynra, ki dkhot ka KSU kila leit ap pahara ha kylleng ki dong ka thain Laban ba kynthup ha Red Cross, Iewdak (kiba hap hapoh ka Laban Dorbar), Mynsian Ranab, Cliford Nongrum road (KOR Dorbar) bad ka Taxi point kaba hap hapoh ka Lumshatsngi Dorbar Shnong.
Ha kane ka jingap pahara, ka KSU kala ioh bat haduh 58 ngut kibar Jylla bad napdeng kine, 22 ngut la shem ba kim don satia ia ki kot ki sla ban pynshisha ialade.
Ka KSU kala shem ba bun na kine ki briew ba ioh bat ki dei ki poiwir Muslim na Assam bad na kiwei ki Jylla, kiba wan sah wai khlem da pyntip ia ka Dorbar Shnong.
“La shem ba ki nongshongshong Muslim ka Laban bad Lower Lumparing kila aiwai bad jaka sah ia kine ki briew” ong u Jason Laloo, General Secretary ka KSU Laban Circle ha ka kyrwoh ba pyllait ha ka sngi Saitjain.
“Kane kala pynlong ia ka KSU ban nang pynjur ia ka jingkhynra ha Three Pine Colony (Laban) kaba don kumba 80 haduh 100 tylli ki longiing muslim. La shem ba bun na kine ki longiing kila ai jaka sah ia kine ki poi ei muslim ba wan na Assam” ula ong.
Ka KSU kala ai ka jingmaham kaba tyngeh pyrshah ia kito kiba ai iingsah ia ki poi ei muslim kiba wan na Assam bad na kiwei ki Jylla.
“Ngi buh ruh ia ka jingmaham ia ki nongialam jong ki Masjid/Mosque ba kim dei ban ai jaka sah ia ki poi ei muslim kiba wan na Assam bad na kiwei ki Jylla” ong u Laloo.
“Ngi la rai ban nang pynjur ia ka jingkhynra bad lada shem iano iano kiba aiwai ia kine ki poi wir, ngin leh da kaba tyngeh pyrshah ia ki” ula bynrap.
Ia kine ki briew bala bat la aiti noh sha Laban Police Station ba kan leh ia kaba donkam kat kum ka lynti jong ka ain.
-Laban Circle ha ka sngi Thohdieng, kala ioh bat haduh 22 ngut ki bar jylla ba suba dei ki muslim ba wan poi ei na ri Bangladesh, kiba wan shong wan sah beain ha ka thain Laban.){kind=link}