Shillong, Nailar 29: Ka Meghalaya hynne ka sngi ka la rakhe ia ka National Sports Day da kaba pynkupburom ia ki 136 ngut ki nongialehkai bad 22 ngut ki Coach kiba la iashim bynta ha ka 6th Meghalaya Games.
Kum ka jingpynkup burom, la sam ruh daki song pisa shaki 103 ngut ki nongialehkai lyngba ka skhim YESS Meghalaya haka jinglut kaba T.45 lak.
Iaka jingrakhe National Sport Day, la pynlong da ka tnat Sports & Youth Affairs ka Sorkar Meghalaya ha Shillong bad ha Tura bad kane kadei ka dak ban pyni ïa ka jingangnud jong ka Jylla ban pynroi ïa ki sap bad ban pynkhlain ïa ki lad jingïalehkai ha kylleng ka Jylla.
Iaka YESS Meghalaya la sdang ha u snem 2022 da u Myntri Rangbah ka Jylla u Conrad K Sangma kum shi bynta ban ai ka jingkyrshan pisa sha ki Seng Samla, ki Society, bad ki Seng trei mon sngewbha.
Ia kane ka prokram la pynwandur khnang ban pynkupbor ia ki samla da ki jingpynsngewthuh paidbah, ki ai jinghikai, bad ki kam kiba bun jait ban don ka jingiashim bynta ha ka imlang sahlang khnang ba ki samla kin long ki nongialam.
U Myntri ka tnat Sport u Bah Shakliar Warjri u la pynpaw ïa ka jingdonkam jong ka National Sports Day kum ka jingpynkynmaw ïa ka jingaiti jong ka Jylla ha ka koit ka khiah, ka jingïadon bynta lang, bad ka jingpynkupbor ïa ki samla lyngba ki jingïalehkai.
U Bah Shakliar u la ong, “Naduh u snem 2018, ka tnad Sports & Youth Affairs ka la nang kiew stet bha. Wat hapdeng ki jingeh baroh, ka Sorkar ka la ïoh ïa ki jingkiew kiba khraw bad ki mawjam. Ka jingthmu jong ngi ka long ban lah ban pynmih ïa ki nongïalehkai napoh ka Jylla ha ka Olympic Games ban wan”.
U Myntri u la pynpaw ïa ka jingïaid beit ïaid ryntih jong ka Meghalaya Games kum ka jingpynshisha ïa ka kolshor ïalehkai jong ka Jylla kaba nangroi.
U la kdew ba ka Sorkar ka wanrah ïa ki jingpynbha kiba kongsan lyngba ki jingtei kiba kham bha, ka jinghikai ba tbit, bad ka jingkyrshan ban pynshlur, katba ka pynrung ruh ïa ki jinglong jong ka jingaiti bad ka jinglong ba ryntih kiba batai ïa ki nongïalehkai ba shisha. Da kaba kyntu ia ki nongialehkai samla ban shim ia kawei pa kawei ka kabu.
U Myntri ula pynbna ban sdang ïa ka Megha Fit Phase 1 da ka jingbei tyngka kaba nyngkong ba palat T.20 lak da kaba ban jur ïa ka jingdonkam ban tei ïa ka Meghalaya kaba koit ba khiah.
Ula pynpaw ba ka Jylla kan sa seng shen ïa ki sports Hostel da ka jingmang pisa kaba T.100 klur, ba la dep ban mynjur na ka bynta kane ka jingthmu. “Ka pisa ba la pynlut kam dei tang ka jingpynlut hynrei ka dei ka jingbei tyngka namar ngi ngeit ba kane kan ai bor ïa ki Sports Association bad ïa ki samla baroh kawei” ula ong.
Ha Tura, iaka jingrakhe National Sports Day la wan sakhi da u Nipon Hajong, MCS, Additional Deputy Commissioner ka West Garo Hills, uba la ban jur ïa ka bor pynkylla jong ka jingïalehkai ha kaba kyntiew ïa ka jingïatylli bad ka jingbha jingmiat.
