Ban khanglad ia ka jingpyndonkam ia ki Aadhaar Card thok
Shillong, Nailar 27 : Ka Tnad General Administration Department kala pynmih ïa ka circular kaba bthah ïa baroh ki tnad ba dei peit bad ki paidbah ba kin pyndonkam ïa ka Unique Identification Authority of India’s (UIDAI) Aadhaar QR Scanner App na ka bynta ban pynshisha offline ïa ki Aadhaar card.
Kane ka sienjam ka long ban khanglad ïa ka jingpyndonkam bakla ïa ki Aadhaar card kiba thok ne kiba la shna thok.
Ka UIDAI ka la pynrung ïa u Secure QR Code ha man la ki shithi Aadhaar, PVC card, bad ka e-Aadhaar ba download, kaba don ïa ki jingtip ba kongsan jong ka jingbun briew bad ka dur jong u nongbat Aadhaar.
Ia une u code la soi da ki kor digital, bym lah ban pynjulor, bad lah ban pule tang da kaba pyndonkam ia ka scanner bala mynjur da ka UIDAI lane ka Aadhaar QR Code Scanner App ka Sorkar.
Ka Secure QR Code ka ai katto katne ki jingmyntoi, kynthup: ka jingpynshisha offline, kaba pynlong ïa ka kaba biang bha ban pyndonkam ha ki jaka ba jngai kiba duna ki lad pyniasoh, ka jinglap mardor ïa ki jingbym ïahap ne ki kot ki sla Aadhaar thok bad ka jingpynkhlain ïa ka jingïada bad jingshaniah.
Ka tnad ka la bthah ia baroh ki ophis, ki agency, bad ki nongshong shnong ba pyndonkam ia u Aadhaar QR code verification bad ban long kiba husiar na ka jingpyndonkam ia ki kot ki sla kiba shna thok.
Ki jaka treikam kiba la ai jingmut ban pyndonkam ia ka App ki long ki tnad sorkar bad ki nongtrei kiba leit sha ki shnong ki thaw, ki Bank, ki NBFC, ki kompeni insurance, bad ki nongpynbiang ia ki jingshakri telecom, ki nongbylla bad ki trai jaka, ki hotel bad ki iing sah basa, ki notary, ki nongiasaid ain, bad ki nongpynshisha ia ki kot ki sla bad ki paidbah nongshong shnong na ka bynta ban pynshisha hi dalade ia u Aadhaar.
Lada jia ba suba ba la pyndonkam bakla ïa u Aadhaar, la bthah ban pyntip ïa ki jingjia sha ka UIDAI lyngba ka [email protected] lane phone ha u number 1947, bad pyntip sha ka Ophis jong u Deputy Commissioner lada suba ba don ka jingleh thok.
 Aadhaar QR Scanner App na ka bynta ban pynshisha offline ïa ki Aadhaar card.){kind=link}