Shillong, Nailar 26 : Ka Iingkashari Meghalaya High Court kala bthah ia ki bor Sorkar ba kin pynbteng ia ki jingleit pynshai paidbah bad ban shim ia ki sienjam ha kaban khang ia ka jingthied, jingshna, die bad pyndonkam ia ki pla plastic ba hapoh ka 120 micron.
Kane ka jingbthah ka Iingkashari kala mih haba bishar ia ka public interest litigation (PIL) bala ujor da u Phuyosa Yobin, kaba kyrpad ban khang noh lane tehlakam ia ka jingpyndonkam ia ki pla plastic hapoh ka Jylla.
“Ngi bthah ia ki bor Sorkar ba kin pynbteng ia ki jingpynshai paidbah bad ia ki kam ha kaban khang ia ka jingthied, shna, die bad pyndonkam iaki pla plastic ba hapoh ka 120 micron” ong ka Division Bench ba kynthup ia u Chief Justice IP Mukerji bad Justice W Diengdoh ha ka hukum ba pynmih ha ka sngi Ba-ar.
“Ia kane ka PIL la pynwai noh da kaba ailad ia kino kino ki briew ba kin aplai ia ka aplikeshon ba thymmai, lad aka don kano kano ka jingpynkhein ia ka hukum ka Iingkashari” kala ong.
