Leit ai jingiarap ka NPWF ia ka Khynnah ba shah dung nar injek ha Jaiaw

Shillong Nailar 20: Ka National Peoples Womens Front (NPWF) kala pynrem jur ia ki runar kiba la dung nar injekshon ia kawei ka khynnah skul ha Jaiaw bad kyntu ia ka sorkar bad ia ki pulit ba kidei ban kem mardor ia kine ki runar bad ban ai ka jingpynsajia da kaba tyngeh.

Ka NPWF kala pynpaw ia kane ha ka jingwan peit ia kane ka khynnah kaba dang shah shumar ha Dr H Gordon Roberts Hospital hynne ka sngi Balang.

Ka NPWF hapoh ka jingialam ka President ka Kong Grace Mary Kharpuri kaba long ruh ka MDC ka KHADC, kila leit kitbok kitrwiang ia kane ka khynnah ba kan ioh noh ia ka met kaba koit ba khiah bad kila ai jingiarap da ka song tyngka.

“Ngi dap da ka jingsngewkhia ba ka khynnah kaba dang rit kala shah thombor ia kaba ym pat ju jia koit ha kane ka jylla ba ki runar kila dung da u thyrnia injekshon bad ngim tip don aiu hapoh une u injekshon bad kaei ka jingthmu ka jongki. Nga pynrem jur ia kine ki runar kiba leh ia kane ka kam sinew” ong ka Kong Grace Kharpuri.

Kala kyntu ia ka sorkar jylla bad ia ki pulit ba kidei ban shimkhia bad ban kem mardor ia ki runar kiba donkti bad dei ruh ban pynshitom da kaba tyngeh ia ki khnang ba kum kane ka jingjia kan ym jia shuh.

Kala ong ba ha kylleng jong ka jylla, ki longkmie kila shah thombor la ka long ha ki iing ki sem ruh kala shyrkhei bha bad la shim ruh ia ka jingim jong ki longkmie bad kumta ka kyrmen skhem ba ka sorkar bad ka tnad pulit kan shimkhia.

“U droks ula jyllei shaba palat ha kane ka jylla jong ngi, dei ban shim ia ka sienjam ba tyngeh bad hap ban wad ia ki lad ki lynti, ba kumno une u droks u ioh ban rung ha kane ka jylla bad kala dei ka por ba baroh khoit ngin ia iengtylli lut naduh ki nongshong shnong haduh ki nongmihkhmat, ki sengbhalang ban rat dyngkhong syndon ia une u jingthaw uba la wan ban pynjot ia ka jylla bad ia ki longiing longsem” pynkut ka Kong Grace.