Shillong, Nailar 19: Ka North East United FC kala ioh rung sha ka Final jongka Durand Cup da kaba pynrem ia ka Shillong Lajong FC ha ka jingiakhun ia ka semifinal kaba la long hynne ka janmiet ha JN Stadium, Shillong.
U Redeem Tlang ula thep ia ka kol na ka bynta ka NorthEast United FC ha ka kylla step kaba la pynthikna syndon ia ka NorthEast United ban poi sha ka Final bad kane kadei ka sien ka baar ba ka Shillong Lajong kan shah pynrem biang ha ka NorthEast United ha ka semi final jong ka Durand Cup kumba kala shah pynrem ha u snem uba la dep.
Ha ka kylla step la sakhi ba ka Shillong Lajong kala pyrshang ban tehlakam ia ka NorthEast United ban ialehkai laitluid ban tur shakhmat ha kaba kala pynlong ia u Ajaraie bad Jithin M.S ban long jar jar ha ka rukom ialehkai ka jomngki. Kala don tang ka jingpyrshang jong u Chema Nunez bad u Andres Rodriguez ban ioh the pia ka kol hynrei kila leit beit beit sha u nongap kol.
Ha kawei ka liang ka Shillong Lajong kala pyni ia la ka jinglah ban ialehkai bha ban tur kylla shakhmat hynrei kim shym la lah satia ban thep kol pat ha kaba kiba bun ki jingshut ia ka bol kidei kiba la shut na jngai. U Everbrightson Sana ula ialhekai bha bad ula lah ban pynklumar khlieh ia ki rang ialehkai shadien jong ka Northeast United ha kiba bun ki khyllipmat.
Ka NorthEast United kala ioh ban jam shaphrang da kaba the pia ka kol ha ka 36 minit tang hadien ba kala don ka jingpynsangeh shipor ia ka jingialehkai haba u nongkhmih ia kane ka jingiakhun u S. Senthil Nathan la hap pynshong noh namar ka jingmynsaw bad la mih bujli noh da u Lalit Singh Rawat.
Mar ia sdang hi kane ka jingiakhun u nongialehkai barim jong ka Shillong Lajong u Redeem Tlang ula shut jam ia ka bol na jngai ha kaba u nongap kol ka Shillong Lajong u Siwel Rymbai ym shim la lah satia ban iada ia katei ka bol bad kala leit rung shapoh kol.
Ka NorthEast United kala thaw ia kiba bun tylli ki kabu ha ka kylla miet hynrei ka Shillong Lajong kala nang tur shakhmat ban ialeh ban pyniakhiad hynrei kam shym la lah ban ioh thep kol eiei.
U Andre Rodriguez ula ioh ia ka kabu kaba biang hynrei haba ula shut ia ka bol kala dei pynban ia u diengkol.
Ka NorthEast United kala bteng ban ialeh ban bat ia ka bol bad ialehkai ha ka rukom ban tehlakam bad ban ym ailed ia ki nongialehkai ka Shillong Lajong ban ioh thep kol bad kala bteng ia kane haduh ban da kut ka jingiakhun ban pynthikna ba ka Northeast United kan rung sha ka final jong ka Durand Cup.
