Shillong, Nailur 09 : Ka ophis ka District Tuberculosis, East Khasi Hills District ha ka sngi Thohdieng ka la pynlong ia ka prokram ai jinghikai halor ka jingpang Tuberculosis ne TB na ka bynta ki samla pule jong ka Department of Social Work ka St. Edmunds College, bala pynlong ha ka District TB Hall kaba don ha Mawprem, Shillong.
Ka phang pdeng jong katei ka prokram ka long, “To ngin snohkti lang na ka bynta ban rat dyngkhong iaka jingpang TB” ia kaba la pyniaid da ka Kong Tracy Kharkamni, State Coordinator.
Ha kane ka sngi, u Dr.M Mawrie, State TB Officer u la wan ban donlang kum u Nongkren ba Kongsan. Ha ka jingkren u la ong ba ki samla pule ki dei ki lawei jong ka jylla bad ruh ba kumno ki jingmlien ba sniew khamtam kum u duma bad ka kyiad ki lah ban ktah ia kakoit ka khiah jong ki.
Ha kane ka sngi, ki samla pule jong ka St. Edmunds’ College bad ruh na ka Women’s College ki la pynlong ruh ia ka skit kaba lyngkot haba iadei bad ka jingpang Tuberculosis bad ba kumno da ka jingkyrshan lang ki bahaiing ha sem bad ki paralok parajor ka lah ban weng bad pynkoit pat ia ki.
Ka Dr. J.Kharwanlang, District TB Officer (DTO) kaba dei ruh ka nongkren ba kyrpang ha katei ka sngi ka la batai shaphang ki dak ki shin jong katei ka jingpang nangta shaphang ka jingpang pulmonary bad extra-pulmonar bad ruh ia ki projek jong ka NTEP.
Ka la banjur ruh halor ka jingdonkam ai ia ka tika BCG ha ka jingim ki khynnah rit bad kumno ban iada ia ki. Ka la pynshai ruh shaphang ka jingngeit biej kaba iadei bad katei ka jingpang kaba ki paidbah ki ngeit ba ka lah ban iabit tang na kaba ia pajut kti ruh lane ka jingiasam ia ki jingbam hynrei ka la ong ba katei ka jingpang ka phriang na ka lyer
Hadien kane, ka Tracy ka la pynlong ruh da ka jingiakob kyntip bad pynkut pat da ka jingshim ia ka kular ban iakhun lang ia ka thma pyrshah ia ka jingpang TB da kaba iarap bad kyrshan lang ia kito kiba ioh ia katei ka jingpang.
Ha katei ka jingialang ki la don kumba 90 ngut ei ei ki samla pule Social Work kynthup ia ka Professor Eda Kynta bad Professor Aibakor Kharbuli na BSW Department St. Edmund’s College
