Guwahati, Nailar 9: Haduh 146 tylli ki longiing kiba la shah kyndang ha ka thain Negheribil kaba hap hapoh ka Golaghat District Assam, ha ka sngi Thohdieng hadien ba ki bor pyniaid district kila sdang biang ia ka jingkyndang ban pynkynriah ia ki briew ba wan buhai shnong beain.
Kane ka jingsdang ban kyndang kala sdang ha ka sngi Thohdieng ha ka shnong No. 2 jong ka Negheribil kaba don ha ka thain Dayang Reserve Forest. Ka Forest Department bad ki bor pyniaid district kila pynlong ia kane ka jingkyndang da ka lynti ba jai jai ban pynkhuid phar ia baroh kiba wan buhai beain.
Na ka liang ki bor ba dei peit kila pyntikna ba ki bor synshar na ka jylla Nagaland bad ki bor pahara kum ka Central Reserve Reserve Police Force (CRPF) kila ia trei lang ryngkat ban pyntikna ba kane ka jingkyndang kan long kaba suk bas ain.
Katkum ki report, tang ha kine ki ar taiew ka jingkyndng ban pynkynriah ha Golaghat la lah ban pynkhuid haduh kumba 4,000 bighas kaba dei ka jaka jong ka tnad forest.
Ha ka 30 tarik u bnai Naitung, kumba 3,000 bighas ka jaka la ioh ban kam trai biang ha Uriamghat’s Rengma Reserve Forest, katba 278 tylli ki iing briew bad ki dieng kwai kila shah pynpra lut.
Shi sngi hadien, sa kumba 1,000 bighas ka jaka la ioh kurup biang na Nambor South Reserve Forest hadien ba palat 350 tylli ki iing la shah pynpra da kaba suk.
Ia kane ka jingkyndang la leh da ka jingiatrei lang bad ka jingkyrshan na ki bor pahara ba kynthup haduh 2000 ngut kiba dei ki shipai ka Assam Police, ki pulit CRPF, ki forest guards, ha ryngkat bad ki magistrates.
Ka jingkyndang ban pynkynriah kala iaid beit iaid ryntih, ha kaba la antad ba kumba 350–400 bighas ka jaka la shem bad lap ba kila shah kyntur pud beain bad sah ha Negheri Bil,” ong u M.K. Yadava, Special Chief Secretary, ka sorkar Assam.
Ha shwa jong kane ka jingkyndang, ha ka 24 tarik u Naitung ki bor pyniaid district jong ka Golaghat bad ka Forest Department kila ai jingtip sha 205 tylli ki long iing bad ai por ia ki san sngi ban mih noh.
Hynrei ki don 57 tylli ki longïing kiba la ialeh pyrshah ia kahukum ha ka ïingbishar jong ka Gauhati High Court, kaba la ai por shuh shuh ïa ki naduh ka 5 tarik u Nailar, kaba la pynjlan ïa ka por ba la buh haduh ka 15 tarik u Nailar. Ka jingkyndang ba dang sah la pynbeit ban pynlong ha ka 16 tarik mynta u bnai Nailar.
Kane ka jingkyndang ne pynkynriah ka dei shi bynta ka campaign jong ka sorkar Assam ka ba dang iaid sha khmat ha ka jylla baroh kawei ban ioh kam trai biang ia ki jaka jong ka tnad forest land bad ruh ban iada ia ka hok jong ki paidbah riewlum.
