Kyrshan ki Dorbar Kur Khasi ia ka KHADC ba iakhun pyrshah ia ka mukotduma ka Syngkhong Rympei Thymmai

Shillong, Nailar 07 : Ka Synjuk ki Rangbah Kur : Ka Bri U Hynniewtrep, kala ai ia ka jingkyrshan ba pura ia ka Khasi Hills Autonomous District Council (KHADC) ha ka jingiakhun pyrshah ia ka mukotduma bala ujor da ka Syngkhong Rympei Thymmai (SRT).

Ka Synjuk kala leit ban iakynduh markhmat ia u Chief Executive Member (CEM) ka KHADC Bah Shemborlang Rynjah ban pynpaw ia kane ka jingai jingkyrshan ban iakhun pyrshah ia ka mukotduma ban pynkylla ia ka riti dustur sha kaba ai jait kpa ne sha u Shynrang.

U sangot ka Synjuk Bah Rapionglang Blah, ula pynsngew ia ki nia ban iasaid ha kane ka mukotduma na ka bynta ban pynneh ia ka riti kheinkur kheinkha na ka Kmie bad batai bniah shaphang ka saw ka sian ba takhuh ka imlang sahlang lyngba ka rukom mushlia da ki kynhun kiba angnud ban kylla noh ia ka riti dustur ban aijait sha u Kpa.

U Bah R L Blah u la kdew ia ka lanot ha u snem 2014 ha ba ka Kliar Iingbishar ka Jylla (Meghalaya High Court) ka la thmu ban pynduh ia ka iktiar jong ki rangbahshnong bad iuhroit ki Dorbar Shnong.

U la kdew ba ka Kur ka dei ka daw ka ba kham khraw ia ka jaitbynriew ka ba ktah naduh ka riti bat khyndew haduh ka riti jied longsan mansan ha ki shnong ki raij bad ki Hima ryngkat bad kiwei kiwei ki snap riti dustur ki ba ym lah ban lait na ka kam Kur. Nalor kata la pynsngew ruh ba ka don ka jingma ia ka imlang sahlang ha ka pateng ka ba hadien ban sa kynrei ka shong sang ha ka poikha poiman lada la duh noh ka tipkur tipkha. La pynkut nia ba ka daw ba tynrai jong ka mokotduma ka long ban iasaid na ka bynta ban ioh ka syrnot iada riewlum (Schedule Tribe Certificate) ia ki briew ki ba aijait sha u shynrang.

Ha ka ba iadei bad kata ka jingkwah syrnot iada riewlum, u Bah Raphael Warjri u la ban jur ha ki artylli ki mat ba ka Syngkhong Rympei Thymmai ka dei ka seng ka ba thmu ban kylla syndon ia ka riti kheiñkur kheiñkha na ka kmie sha ka ban aijait noh sha u shynrang bad ka ba pynksan ba ka rukom aijait ka dei kat ha ka mon jong ki longiing longsem shimet.

Ula kynthoh juir ba ka SRT ka thrang ban kylla noh ia ka riti dustur ban ryngkat bad ki paidbah ba la kham kiew kyrdan ym iahap ba kin dang dawa ia ka syrnot iada paid riewlum. La ban jur ruh ba ka jingsngew kyllum ha kino kino ki paidbynriew ka dei ban bud ryntih ha ka imlang sahlang bad ym dei da ka jingsngew shimet jongno re jongno ki ba khwan jait sha lade.

Ki dkhot rangbahkur ba la ialam da u Bah R L Kharpran kum u khlieh rangbah bad synran da u Bah Rapiong Lang Blah, Bah Manstudy Nongrem, Bah Raphael Warjri, Bah Aristotle Lyngdoh, Bah Ploster Syiem, Bah Kyrmen Uriah bad Bah Wilbert Shylla, ki la ieng rangbah da kawei ka sur ba ka Synjuk ka kloi ban aikti ia ka KHADC ha kane ka bynta ban aireng ia ka jingthmu jong ka Syngkhong Rympei Thymmai ki ban pyntroiñ ia ka jaitbynriew.