Shillong Nailar 07: Ka Sorkar Meghalaya kala pynkhreh ban pynsted noh ia ka jingker sainar ha khappud jong ka ri India bad Bangladesh, hadien ba la dep ban iapynbeit ia ka jingsngewkhia kaba la pynpaw da ki bor pyniaid shnong.
U Myntri Rangbah u Conrad K Sangma ha ka sngi Palei ula pyntip ba kumba 80-90% jong ka thain khappud kadei kaba la dep ban ker sainar katba kaba dang sah ban ker sainar ka long sa 40-44 kilomitar.
Katkum ka jingong ka jongu, kumba 400 kilomitar jong ka khappud la dep ban ker sainar bad ki kam ki dang iaid shakhmat ban ioh pyndep noh ia ki jaka kiba dang sahteng.
U Conrad Sangma ula kubur ia ka jingsngewkhia jong ki trai jylla bad ka jinglong jingman jong ki mat kiba iadei bad ka imlang sahlang bad ka kam sain pyrthei kala pynsuki ia ka kam ker sainar ha ki katto katne ki jaka. Ula ong, sa kumba 40% jong ki khappud ki bym pat dep ker kan pynlah ia kino kino kiba thmu ban pynjulor lada ki kwah.
Ula ong bai a kiba bun na kitei ki mat kidei kiba la lah ban ia pynbeit lyngba ka jingiakren bad ki paidbah ha ki shnong ki thaw bad ka jingiakren ha ka kyrdan jong ki Deputy Commissioner.
U Myntri Rangbah ula pynpaw ia ka jingkyrmen ba ka ker sainar ha khappud ha ki jaka kaba la dep ban ioh jingbit yn sa sdang noh bad kaba sah mynta ka long sa tang ban pyndep ia ki bynta kiba iadei bad ki bor kiba dei khmih.
“Nga lah khmih bniah ia kane ka kam mynta la jan don shi bnai shiteng eiei bad nga lah ban iohi ha ka jingkhmih bniah ba na katei ka 40 km sa kumba 4-5 km kadei kaba la don ia ka jingeh kaba la ngam jylliew bhai a kaba ki paidbah kim pat pdiang bad ngi dang iaid halor kane ka bynta” ong u Conrad Sangma haba iakren bad ki nongpathai khubor.
“Nga lah pyntip ia kane sha u Myntri Kam Pohiing ka ri bad sha ka MHA bad nga khmih lynti ba ki kam ha ki jaka kiba la ioh jingbit na ki paidbah kan sa sdang noh ka jingtrei namar kila don ki kam kiba hap ban iaid na ki bor synshar hynrei ki mat kiba iadei bad ka imlang sahlang bad ka kam sain pyrthei mynta la dep ban pynbeit hapoh jong katei ka 40 km, kaba bun hi bad mynta kadei ban ioh jingbit na ki bor kiba dei khmih” ula ong bad ka pynpaw ia ka jingkyrmen bai a kane ka mat yn lah ban pynbeit noh mardor.
