Doomdooma, Nailur 09 :Sa shisien pat u pulit langrut ula kylla long u lanot ha ki ophisar kiba don hapdeng ka jingbitar, kata hadien ba uwei u pulit ka tnat Forest (forest guard) ula hap ban duh noh ia shiliang ka khmat hadien ka jingshah thombor ha u DFO (Divisional Forest Officer) jong ka Doomdooma.
Kane ka jingjia kala jia ha ka sngi Balang ba la lah hadien ba u DFO la kynnoh ba ula thap tyngeh ia une u forest guard bun bun sien kat haduh ba ka pyllew khmat jong u kan kynriah na ka jaka kaba ka dei ban shong.
Ia une u lanot ba la tip kyrteng kum u Hemakanta Hatimuria la pynkit mardor shapoh First Referral Unit (FRU) ha Doomdooma hadien jong katei ka jingjia kaba la pynlong ia u ba un ym iohi shuh ban iohi shiliang ka khmat nalor ka jingmih snem na kane ka khmat ka diang ka jong u.
Nalor kata une u forest guard ula shah pynsangeh noh na ka kam khlem da pynmih shuh ia kano kano ka jingpyntip.Haba kren sha ki lad pathai khubor, une u lanot, u Hemkanta Hatimuria ula ong, “La khot ia nga da u DFO ka Doomdooma, u Rajendra Prasad Bharati hapoh ka ophis jong u hadien ba ula tim la tla ia nga, ula thab tyngeh ia nga arsien khlem kano kano ka daw.Kane kala pynlong ia shiliang ka khmat jong Nga ba kan kynriah na ka jaka kaba ka dei ban shong (socket) bad la pynkit noh ia nga shapoh Doomdooma FRU na ka bynta ban aijingsumar.” Ula ong ruh ba une u DFO ula pynsangeh noh ia u na ka kam bad pynmih da ka hukum ban pynsangeh kam shipor.
Nalor kata une u lanot ula kynnoh ruh ba une u DFO ula thombor ia u hadien ba ma u lem bad ka kynhun jong u kim shym la ioh ban kurup ia kawei ka trok kaba kit dieng beain ha ka por ba kila pynlong ia ka jingiaid pahara.
Ha kawei pat ka bynta ia u Hemakanta ha hap ban puid bad pyndait da ka khmat ka bym shisha (prosthetic eye) bad la ai ruh ia ki dawai dashin khnang ba un ioh noh kloi ia ka jingkoit.
Kham hadien na ka ling une u forest guard ula leit ban ujor sha ki bor pulit hapoh Sangli District bad na ka liang ki pulit ruh kila shim ia kila shim ia ki sienjam na ka bynta ban pynshitom.
