Shillong, Nailur 08: Ka Joint Action Committee (JAC) Against Casino na Ri-Bhoi District kila leit iakynduh ia u Myntri Rangbah ka Jylla Conrad Kongkal Sangma hynne ka sngi palei ban pynpaw ia ka jingpyrshah kaba jur ia ka jingthmu buh Casino hapoh ki shnong khappud jong ka District.
Kane ka Joint Action Committee ka kynhun ia ki kynhun Sengbhalang-ka Khasi Students Union (KSU)-North Khasi Hills, ka FKJGP-North Khasi Hills bad ka HNYF-North Khasi Hills lem bad ka Synjuk ki Rangbah Shnong ka Ri-Bhoi.
Haba iakren bad ki nongthoh khubor, u Secretary ka JAC Bah Ferdinald Kharkamni uba dei ruh u President ka KSU-NKH, ula ongba ki Nongshongshnong ka Ri-Bhoi District ki pyrshah jur ia ka jingthmu jong ka Sorkar ban buh ia ka ktem khalai Casino ha ki shnong khappud ka District.
“U Myntri Rangbah ula pyntip ba ka Sorkar kala burom ia ka sur u paidbah khamtam ia u paidbah ka Ri-Bhoi bad kala dep rai ruh ban pynsangeh noh ia kane ka jingthmu (ban buh Casino)” ula pyntip.
Kat kum ka jingong jong, kane ka jingialang ka long kaba seisoh bad u Myntri Rangbah ula pynthikna baka Sorkar kan ym pyniaid shuh shakhmat ban buh ia kane ka ktem khalai namar ka jingpyrshah jur jong ki kynhun bapher bapher.
“Ngi pyrshah ia ka Casino namar ngi sngew ba kan pynkha roi ia ki jingsniew ba bun jait ha ka thain” ula ong.
Ha kajuh ka por, une u Nongialam Sengbhalang ula ong ba ki Kynhun Sengbhalang kim kwah satia baka Sorkar ka kyntiew ia ka Jylla na ki jaka khalai ne kam khalai hynrei ka dei ban pynleit jingmut kum ha ki kam jngoh kai, ka pule puthi, kam ialehkai bad kiwei kiwei ki ban ai jingmyntoi ia ki paidbah bad ki samla.
