Shillong, Nailar 01: U MLA ka Jirang Bah Sosthenes Sohtun ula bthah ia u Deputy Commissioner ka Ri-Bhoi, ba un pynlong ia ka jingjurip ba man ka por halor ka jingkynnoh pyniaid Night Club bad jaka khalai beain ka Queens Hotel kaba don ha Jorabat.
Une u MLA ula iathuh ba ki jingujor kila wan na ki paidbah ba kane ka Hotel kala pyniaid ia ka Night Club bad jaka khalai ha manla ka miet sngi Thohdieng, Sngi Saitjain bad Sngi U Blei.
Haba iakren bad ki nongthoh khubor, u Bah Sosthenes ula pynpaw ia ka jingsngewkhia kaba jur halor kane bad pyntip ba u la dep kren ia u DC ba un phah jurip bad leh eiei halor kane ka kam beain.
U ong ba ki paidbah kila pyntip sha u ba ha kine ki sngi kut taiew, ka jingia ieng kali rem dor ha kane ka jaka kala pyn artatien shibun bha bad pynsuba jur ba kane ka hotel ka pyniaid ia ki kam beain.
