Guwahati, Naitung 31: Ka sorkar Assam kala pynmih iaka jingpynbna paidbah kaba la bthah ban wad ia ki lad ki lynti ba kyrkieh ban weng ia ka jingeh, hadien ba ki 27 tylli ki district hapoh ka jylla kala mad ia ka jingeh kaba khraw namar ka jngduna slap kaba long haduh 40% kaba la wanrah ia ka jingkyrduh um.
Katkum ka jingbthah kaba la pynmih ha ka 28 tarik u Naitung 2025, sha baroh ki District Commissioner (DC) la bthah ba kin peit bniah ia ka jingtrei kam jong ki Scheme ka Tnad Irrigation sha ki thain ne jaka ba shah ktah bad ban pyntikna kumjuh ruh ban pynbha pat ha ka por kaba biang hangno hangno ba donkam.
“Ka tnad Agriculture kadei ban pyntikna ia ka jingdon ha ki jaka ba lumthup jong ki Bina 10, Bina-11 lane kino kino ki jait kba kiba lah ban ioh tang hapdeng ki khyndiat por ban sam ne ai mardor sha ki nongrep,” la ong ha ka Notification.
Ka jylla ka la ïoh ïa ka jingduna slap ha baroh kawei kaba long tang 43% haduh mynta, ha kaba khyndai tylli ki distrik la pynpaw ïa ka jingduna slap kaba “bun bha” (palat 60% ka jingduna) bad 18 tylli kiwei pat la kheiñ kum kiba “duna” eh (20% haduh 59% ka jingduna) hapdeng ka 1 tarik u Jylliew bad 27 tarik u Naitung.
Napdeng kiba la shah ktah jur eh ki long ka South Salmara (84% ka jingduna), ka Darrang (79%), ka Barpeta (73%), bad ka Bajali (72%). Kiba bun ki distrik ha Western Assam ki la mad ia ka jingduna slap kaba palat ia ka 50%.
“Lada ka jingtyrkhong ka dang bteng, ki nongrep ki lah ban donkam ban pynkylla noh sha kiwei pat ki jingthung kiba lyngkot por. Lada ia ka um lah ban ïoh ha ki 10–15 sngi ban wan, ki symbai jingthung beit beit dei ban ai da kiba ym slem ban ioh ot ia u kba kaba lah ban long ka lad kaba lah ban leh,” ong u Dr. Sanjay Kumar Chetia, u Director ka Research jongka AAU.
