Nongpoh, Naitung 28 : Uwei u rangbah ba kyrteng u Bah EB Nongshli, 46 snem ka rta, la iathuh ba ula ngam jyllop hapoh ka wah Iewsier, Ri-Bhoi District.
Kane ka jingjia kala jia ha ka janmiet sngi U Blei hapdeng ka por 6:46 haduh 7 baje eiei, ong ki Pulit kiba la hiar sha kane ka wah ban wad ia ka met jong une u rangbah uba dei na ka shnong Umtasor Mawdkhar.
La iathuh ba hynnin ka janmiet, u Bah Nongshli lem bad ki katto katne ngut ki paralok kila poi iashongkai ha hapdeng ka Jingkieng Iewsier hynrei kynsan kynsan une u rangbah ula hap nalor ka jingkieng shapoh ka wah bad jah rngai syndon.
Ki paralok kila iahiar sha wah ban iarap ia une u rangbah hynrei ki khlem lap shuh namar ka jingngam bad jah hapoh ka wah.
Ka kynhun Search & Rescue Team jong ka Tnad Pulit Fire & Emergency Service kila hiar sha kane ka wah bad ha ryngkat ki nongshongshong ka thain, kila pynlong ia ka jingiawad ia ka met.
U Rangbah Shnong ka Umtasor Mawdkhar Bah R Mukhim, ula iathuh ba hadien ka jingioh khubor ia kane ka jingjia, ula pyntip mar mar sha ki Pulit ka Nongpoh bad wan mareh ruh sha kane ka wah ban pynlong ia ka jingiawad ia ka met.
U Iathuh ba ki nongshongshnong kila iawad baroh shimiet ia ka met da kaba iangam sha um hynrei kim shym la lapdien satia. Ka jingiawad ia ka met kala sdang biang hynne ka step da ka jingkyrmen ban lap noh ia ka met.
Ka kong Phyrnai Nongshli, para jong une u rangbah ba hap sha um, ula ong ba u hynmen ula mih na iing naduh ka por mynstep da kaba pyntip ba un leit kai sha iing bahaiing. Hynrei, ha ka por mynmiet, ki bahaiing kila ioh ia ka khubor ba sngewsih ba ula hap shapoh ka wah.
Ka kong Phyrnai kala pynpaw ia ka jingsngewnguh ia ki nongshongshnong kiba la iarap ban iawad ia u hynmen jong ka.
