Shillong, Naitung 25: U MDC ka BJP na Tura constituency u Bernard N Marak u la aiti da ka dorkhas sha u Myntri Rangbah ka jylla Conrad K Sangma ba phah tuklar halor ka jingkyndang mynder ri ka Sorkar Assam bad ban pynthikna ba ki riewlum ha ki jaka khappud kin ioh ia ka jingiada na ki nongwan buhai shnong beain.
U Bernard ula ong ba kane ka jingkyndang iaki mynder ri ka ktah ïa ki riewlum kiba bun kiba sah ha ki distrik khappud jong ka Meghalaya, kynthup ïa ka Ri Bhoi, North Garo Hills, bad West Garo Hills, kaba wanrah ïa ka jingtieng bad jingbymshngaiñ ha kylleng ki jaka.
“Nga kyntu ïa phi ban tuklar ïa ka jingkyndang mynder ri daka Sorkar Assam ban pynthikna ba ki jaitbynriew riewlum ha ki jaka khappud kin ïoh ïa ka jingïada na ki nongwan rung be-aiñ ki briew” u la ong.
U Bernard u la dawa ba donkam ban pynrem haba ïadei bad ka jingkren kiba buh jingma ïa ki jaitbynriew riewlum jong ka Jylla, haba kdew ïa ka jingkular jong u Chancellor ka USTM ban ai jingiada iaki briew ba shah beh shnong.
“Kaba sngew shyrkhei ka long ba ki riew saiñ pyrthei, kynthup u MP na Garo Hills Saleng Sangma u pynpaw iaka kyrshan ïa ki nongshong shnong beaiñ ha ki jingïalang paidbah”.
U Bernard u la dawa ban bishar bniah ia ki patta ba la pynmih ha ki jaka rithor hadien ka jingphiah ri da kaba pynphai biang ia ka bor ki Nokma kum ka Bor synshar ia ka khyndew.
U la ong ba ha ka histori, ki jingthombor kiba kum kine ki la long kum ki ain ha ka por jong ka Sorkar Congress ha Garo Hills lyngba ka jingpynrung ia ki patta ba ai wai man ka por hadien ka jingphiah ia ka Bangladesh.
“Ïa ki jaka ba don ha ka khyrnit hynriew ha ki jaka rithor la bujli noh da ki Plain Mauza, bad ïa ki nongwan buhai shnong be-aiñ la ai ïa ki patta kiba mynta ki la kham khlain ban ïa ki kot ki sla jong ki jaka ha ki Autonomous District Council (ADC)” u la ong. “Wat ki jaka bala ai daki Nokma la pynkylla kum ki lease pattas kaba iuhroit iaka hok trai ri” u la ong.
U Bernard ula dawa ruh ban tohkit ïa ki nongmihkhmat kiba pynsuk ïa ki jingrung beain ki briew. Ula kyntu ïa u Myntri Rangbah ka Jylla ban pynsangeh noh ïa ka jingthung kam be-aiñ ïa ki bym dei ki riewlum ha ki jaka treikam kum ki kam shnong bad haki Autonomous District Council (ADC).
