Dibrugarh, Naitung 25: U Myntri Rangbah ka jylla Assam Himanta Biswa Sarma ha ka sngi Thohdieng u la ong ba ka sorkar kan sa pynbna paidbah kum ka jaka thyrkhong ha Assam lada ka jinglong jingman bad ka jinghap u slap ka duna bha.
Haba kren sha ki lad pathai khubor ha Dibrugarh, Myntri Rangbah u la ong, “Ka sorkar ka dang peitbniah bha ha kaba iadei bad ka jinglong jingman ka suin bneng bad kumba ju long ha Assam ka aiom thung kba ka dang iaid haduh u bnai Nailar. Ngi don ia u jait kba ba ju khot Bina Dhan -11 uba lah ban pynmih tang ha i por ba lyngkot kata tang lai bnai, hynrei lada ngim ioh slap ngi hap ban pynbna tyrkhong hapoh ka jylla,” u la ong.
Shuh shuh u Myntri Rangbah u la ong ba ka sorkar kala thaw ia ki plan ia kum kine ki kam kyrkieh ban pyntikna ba ki nongrep kin ioh jingiarap lyngba ka Pradhan Mantri Fasal Bima Yojana (PMFBY) bad ruh na ka State Disaster Relief Fund (SDRF) lada la pynbna tyrkhong um hapoh ka jylla.
“Ngi la dep ban pynbeit ban iakhun pyrshah ia kum kine ki kam kyrkieh. Lada ngi lah pynbna ia ka jingtyrkhong um. ki nongrep kin ioh ia ka jingiarap napoh ka Pradhan Mantri Fasal Bima Yojana bad na State Disaster Relief Fund,” ong u Sarma.
Napdeng ki 35 tylli ki district hapoh ka jylla Assam la don 27 tylli kiba la dep ban niew kum ki district kiba ioh duna bha ia u slap. Ha kine ki khyndiat taiew ba la dep, ka sorkar jylla kala pynbna kum ki jaka tyrkhong ba kynthup ia ka Baksa, Barpeta, Bongaigaon, Dhubri bad Kokrajhar districts.
U Myntri Sorkar ba peit ia ka tnad Revenue and Disaster Management u Keshab Mahanta bad u Myntri Sorkar ba peit ia ka tnad Agriculture u Atul Bora, ha ryngkat bad ka kynhun ki high-level kila ia kynduh ia u met Union Home Minister u Amit Shah ha New Delhi ha ka sngi Palei.
U National President jong ka BJP uba dei ruh u Union minister u J.P. Nadda u la ia don lang ha kane ka jingialang ha kaba u la pynpaw ïa ka jingdonkam halor ka roi ka par jong ka Assam bad ka jingpynkhreh na ka bynta ki jingjia ba sngewsih.
