Shillong Naitung 21: U Myntri ka Pule Puthi Rakkam A Sangma, ula kyntu ia u Nongialam ka Liang Pyrshah bad Myntri Rangbah barim ka jylla Mukul Sangma ban pyndonkam ia ka pisa jong ka MLA Scheme ban phah maramot ia ki skul kiba la jot la pei ha ka jaka ban kynnoh ne kynthoh pynban ia kiwei.
U Rakkam ula ban jur ba man la ki MLA ki don ia ka bor ban bhah ia ka pisa na ka bynta ban phah maramot ne ban shna ia ki skul.
U Myntri ka pule puthi ula ai nuksa ialade ba ula dep ban phah maramot 45 tylli ki skul Ad-hoc bad skul SSA ha ka constituency ka jongu, da kaba pyndonkam ia ka pisa jong ka MLA scheme ha kaba man la ki skul kila ioh T.2 Lak ban shna maramot.
U Myntri ula kyrpad ia baroh ki MLA kynthup ia u Nongialam ka Liang Pyrshah ban pyndonkam ia ka pisa jongka SRWP ban shna pynbha ne ban tei ia ki skul.
“Lada man la ki MLA ki rai ban maramot ne tei ym duna ia 50 tylli ki skul man la ka snem (kan iarap shibun ha kaban kyntiew ia ki jingtei jong ki jaka pule hapoh ka jylla). Nga kwah ban kyntu da kaba sdang naduh na u Nongialam ka Liang Pyrshah ban sngewbha ban pyndonkam ia ka pisa jong ka SRWP kat kaba lah ha ka jaka ban kynnoh ne kynthoh kylla ia kiwei bad udei ban leh ia kaei kaba u ju ialap” ong u Rakkam haba iakren bad ki nongthoh khubor.
U Myntri ula pynpaw ia ka jingeh kaba mad da ka jylla, ha kaba ula ong ba la jan 50% na ki 14,000 tylli ki iingskul kidei kiba la jot ne sniew.
“U Kpa jong nga udei u nonghikai skul. Kam shym la don kano kano ka jingtei ia ka Lower Primary School ha ka por ka jongu. Ka paw la kumba ym don ba don ia kano kano ka jingsngewkhia. Hynrei ha kine ki 4-5 snem kiba la dep hapoh ka jingialam kaba tbit jong u Myntri Rangbah u Conrad K Sangma, ka sorkar kala rai ba baroh ki Government Lower Primary School dei ban shna pynbha noh. Ka lah jia ruh bad kala iaid shakhmat kane ka kam” ula ong bad ka bynrap “Kam long kaba suk namar ba ki don haduh 14000 tylli ki iingskul bad na kane tang 3000-4000 tylli kidei kiba lah ban pyndep mynta bad sa 60-70% kidei kiba dang sah baroh”.
Ula kynnoh ruh da kaba ong, “Kumta u Nongialam ka Liang Pyrshah u lah ban sngewklumar ban iohi ia kine kiei kiei baroh ba kila jia mynta namar ha ka por ka jongu um shim la lah ban leh eiei than. Kadei ka jingshisha ia kaei kaba ula leh ha kine ki 8 snem ha ka por ba ula long u Myntri Rangbah”.
U Myntri ula kyntu ia baroh ki MLA bad MP ban buh hakhmat eh ban leh ia ki kam kiban tei ym ban ia kaba shu kynthoh bad ka ai jingmut ba kidei ban man ia ka pisa ban tei ne maramot ia ki skul na ka bynta ka bha ka miat bad ia ka lawei jong ki khynnah pule.
