Kyntait u Myntri ia ka jingkynnoh ba ka MEG kan aiti ia ki skul/college sha ki shimet

Kynnoh kren khlieh khlieh tdong tdong ia ka VPP

Shillong, Naitung 21 : U Myntri ka tnad Pule Puthi Rakkam A Sangma, ula kyntait ia ki jingkynnoh ba ka Meghalaya Education Grant (MEG) bala tyrwa, ka thmu ban aiti pyniaid noh sha ki riew shimet ia ki skul bad ki college.

U Myntri ula kynnoh ba ka Voice of the People Party (VPP) kala kren khlieh khlieh tdong tdong halor kane ka kam.

“Nga kwah ba ki (VPP) dei ban wan bad iakren bad nga lane ki Ophisar ba kin tip na tyllong halor ka MEG. Balei ki kren khlieh khlieh tdong tdong ia kaei kaba ki kren?. Hynnin, kijuh ki briew ki ong b aka Sorkar kam shym la leh eiei ban pynjanai ia ki jaka pule bad pynbeit ia baroh ki jingeh kiba mih. Haba tip ia baroh ki jingtynjuh, ka Sorkar kala wanrah ia ki sienjam ba donkam bad ki policy. Ha ka sngi kaba bud pat, kijuh ki briew ki ong ba ka Sorkar kan sa aiti pyniaid noh sha ki riew shimet” ong u Rakkam haba iakren bad ki nongthoh khubor ha ka sngi Nyngkong haba kynthoh pyrshah ia ka jingkren jong u nongaiktien ka VPP Batskhem Myrboh.

U Rakkam ula batai ba ka sienjam bala shim da ka Sorkar ka long eh ban pynbeit ryntih ia ka rukom pyniaid ia ka pule dangle da kaba pynduna ia ka jingdon bun kyrdan ki skul bad ki nonghikai naka 14 sha ka 3 : kiban khmih da ka Sorkar, ba ai grant-in-aid bad ki skul shimet.

Kat kum ka jingong jong u, ka jingtyrwa ka thmu ban khmih noh ka Sorkar ia ki jaka pule deficit, kiba ka Sorkar nalade ka siew ia ka tulop jong ki kam bala mang (sanction post).

U Myntri ula ai nukd ia ki college ba paw, kum ka St.Edmunds bad St Anthony’s, kiba la ioh bun bah ka jingkyrshan na ka Sorkar ban siew tulop.

U pynpaw ba ka Sorkar ka kwah ban shimti hi noh bad ban pyniaid noh dalade ia kine ki jaka pule ha ka jaka ban ai pyniaid sha ki riew shimet.

U Myntri ula pynpaw ba ka Sorkar kala dep thaw ia ka Committee ka ban iakynduh ia ki kynhun bapher bapher bad ki Managing Committee jong ki skul, ban iakrenn halor kane ka jingtyrwa.

Hynrei ula pynpaw pat ba ki jaka pule kiba heh kum ka St. Edmunds bad St. Anthony’s College ki lah ban nym mynjur ban ai pyniaid noh ha ka Sorkar. Kat kum ka jingong jonng u, ka Sorkar kala ai ka jingkyrshan pisa ba kot T. 23 klur sha kine ki artylli ki college ba kin siew tulop ia ki nonghikai (70-80 ha St Edmunds bad 100 tam ha St. Anthony’s).

Halor ka jingkylli, u Myntri ula ieng skhem ha ka nongrim ba ia ka rai ban aiti pyniaid noh sha ka Sorkar ia ki jaka pule yn ieh ban shim hi da ki jaka pule.