Guwahati, Naitung 21: U Himanta Biswa Sarma u dei u Myntri Rangbah ka jylla Assam u la pynpaw ka jingshna dam jong ka China ha ka Wah Brahmaputra kan ym da ktah than, haba bynrap ba 70% ka um ha kane ka wah ka dei kaba mih napoh ka ri India.
Haba kren sha ki lad oathai khubor, u Sarma u la pynpaw, “Ka Wah Brahmaputra ka ioh pdiang ia ka um kaba bun tam na Bhutan, Arunachal Pradesh, bad ka jinghap slap ha Assam bad ki stad saian kila pynpaw ba iakane ka wah la bsa da ki tyllong um na India bad Bhutan.
U Sarma u la kam ruh ba ka jingpynthut kaba mih na ka jingshna Dam jong ka China sharum jong ka Wah kan ktah ia ki doh um doh wah ne ki jingthaw ba im ha Wah, bad u Sarma u la bynrap ruh ba ka jingduna ka jingtuid ka um ka lah ban ïarap ban pynduna ïa ka jingktah jong ka jingshlei um, ka jingeh kaba ju jia man ka por ha Assam.
“Ki don ar tylli ki jingmut — kawei ka long ba ki jingthaw ba im ki lah ban shah ktah. Kawei pat ka long ba ka um kaba duna ka lah ban iarap ban tehlakam na ka jingshlei um. Ngam tip kano kaba dei,” ong u Sarma bad bynrap ba dei tang ka Sorkar India kaba biang tam ban ai ka jingbishar.
Shuh shuh u Srama u la pynpaw ka jingshaniah ha ka sorkar kmie ka ba ban sdang ia ka jingiakren bad ka China ha kaba iadei bad kane ka dam. “Namar kata, ngam shym la khuslai”, bynrap u Sarma.
“Ka Brahmaputra ka dei ka wah kaba heh bad kam shaniah tang na kawei ka tyllong um.”
Kane ka jingkynthoh kala mih hadien ka jingsngewkhia jong ki jylla ka thain shatei lam mihngi jong ka Ri India, halor ka jingthmu jong ka China, ban shna ia ki dam kiba heh ha Tibet, kaba don hajan khappud, bad kiba bun ki sheptieng, ba ka lah ban ktah ia ka jingtuid jong ka wah Brahmaputra.
