Shillong, Nailur 07: U Myntri Rangbah ka Jylla Conrad Kongkal Sangma hynne ka sngi Balang ula ong ba shen ka Sorkar kan sa pynmih noh ia ka jingpynbna (notification) halor ka jingthaw ia ki Regional Commttee ki ban wad ia ki lad ki lynti ha kaban lah pynkut noh ia ki jingiakajia pud jong ki hynriew tylli ki jaka ba dang sah bad ka Assam.
“Ngi la dep rai ia ki Regional Committee bad ka jingpynbna kan sa mih noh shen” ong u Conrad haba iakren bad ki nong thoh khubor hadien ka jingialang jong ka kynhun Myntri.
U Myntri Rangbah ula iathuh ba ha ka jingleit Delhi dang shen, ula pyntip sha u Myntri kam Pohiing Amit Shah halor ka jingthmu ban pyn sdang noh ia ka wat ba-ar jong ka jingiakren pynbeit pud hapdeng ka Meghalaya bad Assam
“Ngi la batai ha u halor ka jingiaid ka jingiakren ba ngi la pynlong bad shen ba ngin sa thaw noh ia ki Regional Committee na baroh ar jylla kumba ngi la leh ha ka wat ba nyngkong bad ba ngin pyrshang ruh katba lah ban pynbeit noh ia kane ka kam kham kloi” ong u Conrad.
U Conrad u pyntip ba u Amit Shah ula bthah ia ki Sorkar Jylla ka Assam bad Meghalaya ba kin pyntyllun noh shakhmat ia ka jingiakren pynbeit pud.
U Myntri Rangbah ula aiti ruh ia ka kaiphod halor ki kam bala leh da ka Sorkar MDA ha kine ki saw snem shiteng bala leit noh.
“U (Amit Shah) ula kmen bha ban iohi ia ka jingkiew ka Jylla khamtam haba phai sha ki SHG kiba la don mynta haduh 45000 tylli naka 4000 tylli shuwa ban shimti kane ka Sorkar ba mynta. Ngi la leh kumjuh ruh ia ki Nongrep bad ia ki samla. Ula pynshlur ia ngi ba ngin iaid da ka Cooperative Movement ruh bad ka Ministry ba u khmih kan sa wanrah ia shibun ki plan khamtam haba phai sha ki mar rep jong kane ka thain” ula ong.
