Shillong, Naitung 19 : Ka Myntri ka Koit ka Khiah Kong Ampareen Lyngdoh kala pyntip ia ka jingshem jong ka jingtohkit ba malu mala halor ka jingngat bih na ka jingbam ha Mairang, ha kaba ka khynnah 15 snem Shailynti Marngar, kala iap hadien ba bam ia u sohsaw.
Kat kum ka jingong jong ka, u sohsaw ba thung ha kane ka thain la shem ba la pyndonkam da ki dawai pyniap khniang ba khlain bha.
Haba kren sha ki nongthoh khubor, ka Myntri kala pyntip ba ka dang ap ia ka kaiphod kaba bniah na ki Ophisar, ki ban sa ai jingtip shuh shuh halor ka dawai pyniap khniang bala pyndonkam ban rep sohsaw. Ka kaiphod la khmih lynti ba kan ai jingshai halor ka dawai khniang bala pyndonkam bad kiei kiei kiba jia ha kane ka jingjia.
“Ngin ioh jingtip kaba bniah halor ka dawai khniang bala pyndonkam shisien bala wanrah ia ka kaiphod ha ka miej jong nga. Kane ka dang shu jia bad hynnin namar ba dei ka shuthi, ngim shym la lah ban leit tohkit bad khlem pep ki Ophis kin sap hah ia ka kaiphod jingtohkit bad ngan sa lah ban ai ia ka jingtip ba bniah halor ka dawai khniang ba pyndonkam ban rep sohsaw ha ki thain Mairang” kala ong.
Ka Myntri kaba khmih ruh ia ka kam rep, kala ban jur ia ka jinglong kongsan ban kiar na ka jingpyndonkam ia ki dawai khniang kiba buh jingma ha ka rep ka riang, haba pynpaw ba ka jingbym tip bha katno ba dei ban pyndonkam ia kine ki dawai, ka lah ban lam sah ka jingjia kaba sngewsih.
Ka heprit Shailynti Marngar, kala khlad ha ka 13 tarik Naitung hadien ka jingbam sohsaw ha Mawriang Tyrnai kaba hap hapoh ka Mairang Block. Ki Kmie Kpa bad ki para ruhkila shah ktah bad kila ioh ia ka jingsumar na ka CHC ba don marjan.
Ka heprit Shailyntu kala kem pang kynsan kynran ha ka por b aka don ha Iing bad la u para shynrang bad kala khlad noh hashuwa ban poi ha Nongum PHC.
Ka Myntri kala kular ba ka Sorkar kan sa shim ia ki sienjam kiba dei ban shim, kaba shong kat kum ka jingshem jong ka jingtohkit khnang ban khang lad ia kum kine ki jingjia ba kin nang jia hadien habud.
