Shillong, Nailur 07: U Myntri Rangbah ka Jylla Conrad Kongkal Sangma hynne ka sngi Balang ula ong ba khlem pep, ki Nongialam ka BJP na Delhi kin kren ia u lada ki don kano kano ka jingsngewkhia.
U Myntri Rangbah ula kynthoh ia kane halor ka jingpynpaw jong u National Vice President ka BJP ba khmih ia ka Meghalaya Dr Chuba Ao ba ong ba ka BJP kan sa shim rai ban weng noh na ka Sorkar Meghalaya Democratic Alliance (MDA) hapoh ka shibnai.
Kat kum ka jingong u Conrad, ka jingkren shimet jong u Dr Ao ka dei ka bym lah satia ban shim kum ka nongrim jong ka BJP kum ka party.
“Nga thikna ba lada don kano kano ka jingsngewkhia, ki Nongialam na Delhi jong ka BJP kin ym kiar ban iakren bad nga” ula ong haba iakren bad ki nongthoh khubor.
“Kumba nga ong (lada ki don ka jingsngewkhia), ka dei ban don ka jingialong kawei hapoh ka Party nalor ki MLA bad kiwei ki Nongialam ba kin pynsngew lang ia kajuh ka sur hynrei kumba ngi iohi ba dei tang u Dr Ao uba la kren ia kane bad ym don satia kiba kyrshan ia ka bad nga iohi ruh ba bun ki Nongialam ka Party bad ki MLA pat ki ong da kumwei” ong u Conrad.
Halor ka jingkam u Dr Ao baka Enforcement Directorate (ED) bad ka Central Bureau of Investigation (CBI) kan sa wan tynjuh ia ka Sorkar MDA namar ki jingkynnoh bamsap, u Myntri Rangbah ula ong “Ha ki snem bala leit noh, baroh kila iatreilang, lada don kiba kynnoh ba ka Sorkar MDA ka donkti ha kum kine ki kam, nga sngew ba kila ket ba kila kdew ia lai tylli ki shympriah shalade ruh haba kdew ia kawei ka shympriah shawei pat”.
“Watla kata, ngi la kren shai ia ka nongrim jong ngi bad kaei kaba ngi la leh, ngi la leh kat kum ki kyndon bad kat kum ka ain bad baroh kiei kiei kiba la leh ki dei kiba la leh janai, khuid bad haba shit haba shai” ula ong.
U Conrad ula ong ba ka jingkynthoh u Dr Ao ka pyni ba ka don ka jingbuhshun shimet haba ong “Ngi la ju iohi bunsien ia u ba u pynmih khubor ki bym long satia kiba seisoh namar ki MLA jong ka BJP hi bad ki Nongialam ruh kumjuh kim mynjur ia ka nongrim jong u”.
Ha kajuh ka por, u Myntri Rangbah ula ong ba ka NPP kala pyrshang ban pynbeit ia kino kino ki jingsngew iapher hapdeng ki hynriew tylli ki party kiba iatreilang ha ka sorkar MDA kynthup ka BJP.
“Ngi la pyniaid ia kane ka Sorkar bad ngi lah mad ia shibun ki jingtynjuh ha kine ki saw snem shiteng hynrei ngi la iai neh lang bad ngi la iai pyrshang ban pynbeit ia ki jingiapher jingmut kaba ngi ia don” ula ong.
U Conrad ula ong pat ba un ieh ha ka rai jong kane ka Party (BJP) ban shim rai la kan weng noh ne em na ka Sorkar MDA.
“Ngim lah ban khang ia ki bad ong ia ki ba ki dei ban iadonlang namar ka rai ka dei ka jong ki hynrei ngi khlem ong iano iano ban mih. Ngi la iatreilang bad bun ki paralok, ngi burom ia ki haduh mynta, ngi bat ia ki jingiateh, ngi pynthikna ban ai jaka lem ia ki, ai jinglaitluid bad ruh ban iadon bynta lang haba shim ia kino kino ki rai kiba kongsan” ula bynrap.
Ha kajuh ka por, u Myntri Rangbah ula iengskhem ba ka National Peoples Party (NPP) kam pat ju iatreilang satia bad kino kino ki party ban iakhun ia ki elekshon.
“Ngi la thaw ia ka Sorkar hangne ha u snem 2018 bad ngi la iakhun marwei khlem kano kano ka jingiatehlok lupa. Haba ka NPP ka iakhun ia ka eleshon ha Manipur ha u snem 2017, ngim ju iatehlok bad kino kino ki party bad kumjuh ruh ka long ha Nagaland, Mizoram, Assam ne ha Meghalaya. Ngim ju iatehlok lupa badno badno ruh ban iakhun ia ka elekshon” ula ong.
