Shillong, Naitung 16 : Ki bor pyniaid District ka East Jaintia Hills, kila ioh kurup haduh 1705.451 kilo ka pla plastic ba hapoh ka 120 micron, ha ka jingkhynra ia ki dukan bapher bapher hapoh ka District.
Ia kane ka jingkhynra la pynlong ha ka jinghiar jurip lang hapdeng u Executive Magistrate, ki Pulit bad ki nongmihkhmat na ka Meghalaya State Pollution Control Board (MSPCB) bala pynlong myn ha ka 8 tarik Naitung, kum ka jingpyntreikam ia ka jingbthah ka Iingkashari Meghalaya High Court.
Ka jingjurip bad jingkhynra ka deii kaba la pynlong da ka jingthmu ban khang pyndonkam ia ki pla plastic bas tang hapoh ka Jylla.
Ha kane ka jingjurip, ki bor District kila leit ban khynra ia bun ki dukan ha Iew Ladrymbai, Iew Khliehriat, Iew Sookilo bad thain Umpleng. Baroh lang haduh 1705.451 kilo ki pla plastic stang ba hapoh 120 microns la kurup, ong u Deputy Commissioner ha ka kyrwoh bala pyllait ha ka sngi Balang.
Ha ka 25 tarik Jylliew, ka Iingkashari Meghalaya High Court kala bthah ia ka Sorkar Jylla ban leh eiei ha kaban pyntreikam pyrrkhing bha ia ka jingkhang pyndonkam ia ki pla plastic ba hapoh ka 120 micron hapoh ka Jylla.
Ka Sorkar Jylla kala aiti ruh ia ka kaiphod ba pynpaw ba kala pyntreikam ia ka hukum ka Iingkashari ba 14 tarik Jymmang, 2025, kaba bthah ia ki Deputy Commissioner ban pynlong ia ki jingialang pynshai paidbah, pynbna paidbah ia ki jingktah ki pla plastic ia ka koit ka khiah bad ban shim ruh ia ka sienjam ha ka ban khang ia ka jingshna, die bad pyndonkam ia ki tiar plastic.
Ka kaiphod kala batai ia ka jingpyntreikam ha baroh 11 tylli ki District ia ka hukum, lait noh ka East Jaintia Hills.
Ka Iingkashari kala bthah ia ka Jylla ba kan aiti ia ka kaiphod bala pyntreikam ia ka hukum da ki bor District ka East Jaintia Hills hashuwa ka sien shong bishar ka ban long la 12 tarik Nailar.
