spot_img

Ailad ka Meghalaya HC ban iaid Yatra sha krem Mawjymbuiñ | Khang ban lehniam shah tang ka synreit um

Date:

Share post:

Shillong, Naitung 12: Ka Meghalaya High Court kala ai jingbit ban pynlong ia ka jingiaid Yatra (pilkrim) sha ka Krem Mawjymbuin ha Mawsynram, hynrei dei ban bud ryntih pat ia ki kyndon jingbthah.

Ka iingkashari, kham hashwa kala bthah ba dei ban plie lad ban pynlong ia ka Yatra bad kine ki kynhun kila mynjur ia ki katto katne ki kyndon ban pynthikna ba kan long kaba jaijai bad ka jingiaid pilkrim kaba long ryntih.

Kine ki kynthup ia ki bor pyniaid district kaban pynpeit ba ka jingiaid Yatra kadei ban long kaba jaijai bad kaba iaid ryntih.

Ki nongiaid pilkrim kim dei ban leh ia kano kano ka puja ne jinglehniam hapoh jong ka krem bad kim dei ruh ban rah ia kino kino ki tiar na ka bynta katei ka jingthmu.

Ki pilkrim kin iohlad tang ban shu synreit ia ka um ha u maw uba don hapoh ka krem, tang ha ka rukom jong ka jingleh bad kam dei pat ban long palat pud.

Ki nongpyniaid kin pyndonkam ia ki kynhun ai jingpahara ne Volunteer kiban pyniaid ia ki kali ban kyrshan ia ka yatra.

Katba ia ka jingshngain bad ka jingpynneh iaka shongsuk shongsain, ka jingkitkhlieh kan dei ia ka bor sorkar.

“Da kaba pdiang ia kane ka mat bad ia ka jingpynpaw ia ka jinglong kyrkieh bad ki kyndon jingbthah kiba la ai da ki State Respondent No. 1- 5 lyngba ka Deputy Commissioner bad ia ka kynja jingkular kaba la ai da ka Dorbar Shnong Mawsynram ia kiba iaid Yatra, kumta la bthah ia ki nongmudui ba kidei ban pynlong ia ka jingiaid pilkrim katkum ki kyndon kiba la dep ban pyntip ha ka 10 tarik u Naitung 2025 bad ka iingkashari ka banjur ban long kiba iaid da ka lynti kaba jai jai bad ban kiar na ka jingpynjaboh ne ban pynmih ia kano kano ka jingthud iaka leit ka wan jong ki kali. Ka jingbthah ba ki nongpyniaid kin hap ban pyndonkam da ki nongpahara shimet ne ki Volunteer kum ki Traffic Warden ne ban peit iaka jingiaid ki kali ha ka sngi ba pynlong ia ka Yatra, kadei ban long kaba la bud ryntih bha” la pynpaw ka Single Bench kaba la khlieh da u Justice HS Thangkhiew ha ka hukum kaba la pynmih ha ka sngi Thohdieng.

“Watla kala don ka jingpyrshah kaba la pynpaw da ki Respondent No. 6-8 ha kaba iadei bad ka jingtheh um ia u maw, kumta ban ym noh shilliang bad na ka bynta ka bha ka miat jong ka hok, ki nongpyniaid (nongmudui) kin shah tang ban shu synreit ia ka um ym ban theh um ha u maw ha katei ka sngi kaba la ai jingbit” kala bynrap.

Ka iingkashari kala rai ban tian bishar biang ia kane ka mukotduma ha ka 31 tarik u Naitung 2025 bad kala bthah ia ki kynhun ba kin iakren bad shim ia ka rai ia ka Tarik ban pynlong ia ka Yatra, ia kaba yn sa pyntip pat sha ki bor pyniaid district.

Share post:

spot_img
spot_img

Popular

More like this
Related