Dawa aiti hapoh 7 sngi ia ka kaiphod halor ki sienjam bala shim
Shillong, Risaw 22 : Haba kynnoh ia ka Tnad Social Welfare ba ka shim ia ki jingujor kiba khia thew tang kum ki kam ban pyndep rukom, ka Khasi Students Union (KSU), Malki Circle kala ai notice ba aipor 7sngi ia ka Sorkar Jylla halor ka jingbym leh eiei pyrshah ia u Director, ka Composite Regional Centre for Skill Development, Rehabilitation and Empowerment of Persons with Disabilities (Divyangjan), (CRCSRE- Shillong).
Ha ka dorkhas sha u Commissioner & Secretary ka Tnad Social Welfare, ka KSU kala ong ba kam sngewhun namar ym shym la don kano kano ka jingkylla kaba lah ban ïohi ha madan, watla ka tnad ka kam ba ka la shimkhia bad leh ïa ki kam kiba donkam halor ki jingujor.
“Ngi khmih lynti ba ka tnad kan sngewthuh ba ka jingbahkhlieh ïa la ka kamram kam dei ka lynti kaba lah ban iaid lait, bad ba tang namar ba iaka ujor la pyniaid lyngba kiwei ka ophis, kam mut ba ka tnadkala pyndep iala ka kamram” ong ka KSU.
Ka KSU ka ong ba ki jingujor kiba hashuwa bad ka notice ba 7 sngi kim shym la pynmih satia ia uno uno u soh.
“Watla ngi la dep phah ïa ki jingujor ba hashuwa bad ai ruh ïa ka jingmaham kaba hynñiew sngi sha ki bor ba dei peit, ka jinglong jingman ka dang long kaba sngewsih bad bym hun satia,” pynpaw ka KSU.
Ka seng ka la buh jingkylli ïa ka jingkam jong ka tnad ba ka la leh eiei halor kane ka kam.
“Ngi kyntait ban pdiang ïa ki kam bala leh da ka tnad kaba don tang ha ki jingthoh katba ka jinglong jingman ha madan kam shym la kylla satia,” ong ka shithi haba bynrap, “Ia ka jubab ba la ai da ki bor sorkar ym lah ban shim kum ka jingpynbeit kaba hun, lada ki jingeh kiba don ki dang iai bteng.”
Haba kdew ïa ka bha ka miat jong ki nongtrei bad ki briew kiba don jingduna ha ki dkhot met (divyangjan), ka KSU ka la ong, “Ka burom bad ka bha ka miat jong ki nongtrei bad ki briew kiba don jingduna ha ki dkhot met kim dei ban shah ktah na ka jingbym shimkhia jong ki bor pynïaid, ki jingpynslem bym donkam, lane na ka jingbym lah ban pynthikna ba ki lad pynbeit ki treikam hok. Ym dei ban shah ïa uno uno u briew ne kano kano ka jaka treikam ba kin lait na ka jingbahkhlieh ïa la ki kamram, haba la dep pynsngew ïa ki jingeh kiba khia ha khmat ki bor ba dei peit.”
Ka seng ka la pynpaw shai ïa ka nongrim jong ka, da kaba ong ba tang ki jingkular kim long shuh kiba biang.
“Ka por jong ki jingkular khlem da leh eiei ka la kut. Ngi dawa ïa ka jingleh kaba treikam hok, ka jingtreikam kaba shai bad ka jingbahkhlieh ïa la ki kamram,” ong ka KSU.
Ka KSU ka la dawa ruh ïa ka jubab kaba bniah ha ka dur jong ka shithi, kaba batai shai ïa ki kam kiba la leh shisha da ka tnad.
Ka seng ka la dawa ruh ïa ka Action Taken Report (ka kaiphot kaba bniah halor ki kam kiba la leh), kaba pyni ïa ki jingmih kiba lah ban sakhi.
Haba maham ba ka jinglong iaishah ka la jan poi sha kaba kut, ka KSU ka la ong, “Ka jingbteng jong ngi ban ïakren bad ki bor ba dei peit kam dei ban shim bakla kumba ngi kloi ban shu shah ïa ka jingbym lah treikam jong ki bor pynïaid khlem da don ka por ba kut.”
Haba buh ïa ka por, ka seng ka la ong, “Ngi kyntu ïa ka tnad ba kan pyni ïa ka jingkiew shaphrang kaba don jingmut bad ban ai ïa ka jubab kaba bniah ha ka dur jong ka shithi hapoh hynñiew (7) sngi naduh ka tarik ba ka ïoh pdiang ïa kane ka jingthoh.”
Ka seng ka la maham ruh ba lada ym leh eiei hapoh ka por ba la buh, ki bor ba dei peit kin hap ban shim ïa ka jingbahkhlieh.
Ia kane ka dorkhas la soi da u President ka KSU Malki Circle Iashanborlang Mukhim bad u General Secretary Andrew Gary Dkhar.
