Shillong, Naitung 10 : Ha ka jingpyrshang ban nang wanrah ia ka jingtreikam kaba shai bad ba khuid ha ka rukom thungkam thungkam, ka Sorkar Jylla kala mynjur ban pynsangeh noh ia ka kam leh Interview ha ka thungkam ia ki Group-D ha baroh kawei ka Jylla.
Ia kane ka rai la shim da ka Kynhun Myntri kaba shong jingialang ha ka sngi Palei ha Iingsah u Myntri Rangbah ka Jylla.
Haba pynbna ia kane ka rai, u Myntri Sorkar Bah Paul Lyngdoh ula ong ba kane ka rai ka dei kaba iaid kat kum ka policy ka Sorkar ban pynthikna ia ka jingtreikam kaba shai ha ka thungkam thungjam bad kaba iaid ruh kat kum ka jingbthah naka Tnad Personnel and Training, Ministry of Personnel, Public Grienvances and Pension.
“Halor kane ka rai, baroh ki jingthungkam ha ki kam Group-D yn sa pyniaid noh khlem da donkam shuh ban pynlong ia ki interview. Kane kan treikam naduh ka 1 tarik Risaw, 2025, kaba mut ba kan treikam nangne shakhmat” ula ong haba iakren bad ki nongthoh khubor.
“Ka mut ruh ba baroh ki interview kiba la buh ban pynlong naduh ka 1 tarik Risaw, mynta u snem, la pynsangeh noh bad ki nongaplai kam kim donkam shuh ban shong ia ka personal interview” bynrap u Bah Paul.
Kat kum ka jingong jong u, kane ka rai kan iarap ruh ban pynsted ia ka jingthungkam ha ki kam bapher bapher bad pynthikna ia ka jingshai bad jinglehhok.
