Shillong, Naitung 08 : U Myntri kam bording ka Jylla bad Chairperson ka North Eastern Regional Power Committee (NERPC) Abu Taher Mondal ula kyrpad ia ka jingiarap song pisa na ka Ministry of Power (MoP) ban kyrshan ia ka project transmission ha ka thain Shatei Lam Mihngi kynthhup ia ka project ba dang pynwandur thymmai ba T.2,270 klur.
Ula ban jur ruh ia ka jingdonkam ban ai kyrpang ia u 132 kv line sha ki jaka khappud ka Bangladesh ban pynjanai ia ka jingsam bording.
Ia kane ka jingkyrpad la buh hakhmat u Chairperson ka Central Electricity Authority Ghanshyam Prasad, uba dei ruh u Chairman ka National Power Committee (NPC),ha ka jingialang 16th NPC ba dang shen ha Courtyard Marriott, Shillong hapoh ka shatei jong ka NERPC.
“Ka Jylla kala pynkhreh ia kane ka transmission plan kaba la ai jingmynjur da ka CEA. Ka project ba dang shu pynwandur thymmai kan kyntiew ia ka jingsam bording sa 760 MVA bad kumjuh ruh ia u lain ba 190 Ckt km, ia kaba ka pisa ba donkam kan kot ia ka T.2,270 klur” ong u Mondal haba iakren bad ki nongthoh khubor.
“Watla ia katto katne ki project, ka song pisa ka dei kaba la pynbeit hi da ka Sorkar Jylla bad ka Ministry of DoNER hynrei namar ka jingduna pisa, ngi la kyrpad ia ka CEA ban iakren ia kane ka kam bad ka MoP ba kan ai lem sha ngi ia ka jingiarap song pisa na ka bynta ki kam kiba dang iaid ha ki Jylla NE. Kane kan iarap ia ngi namar ka jingduna pisa bad kumjuh ruh ban ioh ia une u transmission line” ula bynrap.
U Myntri ula pyntip ruh ba ula kren ia kane ka kam ba iadei ba ka jingdonkam u transmission ia ki Jylla ka thain Shatei Lam Mihngi bad Sikkim haduh u snem 2031-32 bad ka jingdonkam ia ka jingiarap song pisa na ka Ministry of Power.
U Myntri ula kyrpad ruh ban ai kyrpang ia u 132 kv line sha ki jaka khappud bad ka Bangladesh kynthup ia ka Baghmara bad kiwei ki jaka sor, ban pynjanai ia ka jingsam bording bad na ki bynta ki kam kiba kongsan.
“Nga la kyrpad ia u Chairman ka CEA ban iarap ia ngi ban pynioh ia u 132 kv line la kumno kumnp haduh Baghmara bad kiwei ki jaka sor ba don ha khappud ka Bangladesh. Kane kan iarap ha kiba bun rukom kynthup ia ki jingdonkam lada jia kano kano ka jingjia ha khappud” ula ong.
U Myntri ula kren ruh halor ka jingdonkam ban kyntiew kyrdan noh ia u transmission line ha ki jaka kum ha South Garo Hills, West Garo Hills bad South West Khasi Hills.
Nalor kane, u Mondal ula pynbna ruh ba ka Tnad kala ioh ia ka jaka ban buh ia ka sub station ba 132 kv ha Nongpoh, ka ban iarap ban weng ia baroh ki jingeh ha ka jingpynpoi bording bad kiwei ki kam haba iadei bad ka Ri-Bhoi District.
Ha ka jingialang ka NPC, u Myntri ula kren ruh ia ki kam ba dang sahteng haba iadei bad ka jingai jingmynjur ia ki project hapoh ka Power System Development Fund (PSDF) ia ki Jylla ka Thain Shatei Lam Mihngi, kaba la pynsahteng ia ka jingkyntiew kyrdan ia ka SCADA EMS system.
 Abu Taher Mondal ula kyrpad ia ka jingiarap song pisa na ka Ministry of Power (MoP) ban kyrshan ia ka project transmission ha ka thain Shatei Lam Mihngi kynthhup ia ka project ba dang pynwandur thymmai ba T.2,270 klur.){kind=link}