Shillong, Naitung 04: Ka khubor shah rahbor bad shah leh beijot kawei ka samla lud kala mih pyrthei ha Tikrikilla, West Garo Hills, hadien ba ki bahaïing jong kane ka samla lud ba dang 16 snem ka rta ki la ujor FIR ha ki pulit.
U Superintendent of Police (SP) West Garo Hills, u Abraham T Sangma u la pyntip ba ïa une u nongshah kynnoh rahbor bad leh beijot ïa kane ka khynnah la kem bad pynngat hapoh ka aiñ ïada ïa ki khynnah ka Protection of Children from Sexual Offences (POCSO) Act.
U SP u la ïathuh ba katkum ka FIR ba la ïoh pdiang da u Officer-in-Charge ka Tikrikilla Police Station ha ka 3 tarik u Naitung, la pyntip ba ka khun jong u ka la jah rngai na ka jaka sah jong ki ha ka por kumba 3:30 baje mynstep jong ka 30 tarik Jylliew bad hadien ba la wad ïa ka, ki bahaïing ki la lap ba ka don ha ka jaka sah jong u nong shah kynnoh leh kam sniew.
Haba ki bahaïing ki la leit ban shaw ïa ka khun, kala mih ka jingiakynad bad u jingshah kynnoh leh kam sniew.
La kynnoh ba utei u nongshah kynnoh bad kiba haïing hasem jong u ki la pyrshang ban thombor ïa ki da ki wait (machetes) bad ki dieng hynrei wat hapdeng ka jingïakynad, kila lah ban shaw suk iala ka khun.
Ka lanot kala iathuh halor ka jingshah thombor jong ka ha ki kmie ki kpa jong ka bad kala iathuh ruh ba u nong shah kynnoh u byrngem ban pyniap ia ka lada ka iathuh iano iano ia katei ka jingjia.
Ïa Case la pynkynriah noh sha Tura Women Police Station bad la register hapoh ki kyndon ba ïadei jong ka POCSO Act, la ong u SP.
U SP ka West Garo Hills u la iathuh ba ka jingtohkit ka dang ïaid shakhmat.
