Guwahati, Naitung 4: U wei u rangbah briew ba la 28 snem ka rta, hadien ka jingkyndit thiah ha kawei ka hospital shimet ha Silchar, Assam u la lap ba u doktor ula weng ia u tiar jinglong shynrang jong u ha ka por ba ki leh ia ka biopsy test.
Une u rangbah bala tip kyrteng kum u Atikur Rahman uba dei na Jaribam District jong ka jylla Manipur, u la wan sha Silchar ban shah sumar ha RE Hospital bad leh ruh ia ka biopsy test bad u la shem pynban ba u tiar jinglong shynrang jong u la shah weng noh ha ki doctor khlem ka jingmynjur jong u. U nongpang u la duh jingkyrmen bad um tip shuh kumno un leh.
Ha kine ki khyndiat sngi, u la buh ka jingujor sha ki pulit da kaba kynnoh ba ki doctor jong ka RE Hospital ha Silchar kila weng noh ia u tiar jinglong shynrang khlem ka jingmynjur ka jong u ha ka por ba dei ban leh ia ka biopsy.
Ia katei ka kam la leh da u Dr Eden Sinha, uba mynta u la shah ujor ejahar (FIR) ha Gungoor police outpost.
Kat kum ka khubor, kane ka jingjia kala paw paidbah hadien ba une u nongpang uba don ka jingpang ha ka bynta jong u tiar jinglong shynrang, u la wan phah sumar ha u Dr Sinha.
“Ha ka 19 tarik u bnai Jylliew 2025, Nga la leit sha RE Hospital ha Silchar hadien ba don ka jingpang ha ki bynta jong u tiar ka jinglong shynrang. U Doctor Eden Sinha u la ai jingmut ban leh ia ka biopsy test. Ha ka por ba leh ia ka biopsy test, kila weng noh ia u tiar jing long shynrang jong nga khlem ka jingmynjur ka jong nga. Ha ka por ba nga kyndit hadien ba la dep leh ia ka surgery, Nga shem ba u tiar jinglong shyrang la weng noh. Ha ka por ba nga kylli ia u Doctor u khlem ai ka jubab ka ban pynhun ia nga,” la kynnoh u Atikur Rahman.
U Atikur Rahman u la ong, “ Mynta, Nga la duh jingkyrmen bad ngam tip shuh kumno ba ngan leh. Ka jingim jong nga kala kut. Nga la pyrshang ban kren ia ki doctor lah bun sien hynrei kim shym la jubab satia ia ka phone jong nga. Nga don ha ka khim khait ha ka jingmut jingpyrkhat bad nga don jingeh namar ka jingshah sumar.Nga la leit ruh sha kiwei pat ki hospital na ka bynta ka jingsumar hynrei kim shym la peit ia ka bynta ba la shah puid nga.”
U nongpang u la kynnoh ia u doktor bad ka hospital ba ki leh khlem akor ha ka liang ka jingsumar bad pynkhein ia ka jinglong laitluid jong ka met jong u.
Mynta u Rahman u la kyntu ia u Myntri Rangbah ka Assam u Himanta Biswa Sarma ba un tuklar ha kaba iadei bad kane ka jingjia bad ban pynthikna ia ka jingkitkhlieh halor katei ka kam.
“Namar ka jingbym shim khia bha jong ki doctor, mynta u Atikur Rahman u la shimton jur bad shem jingeh bad mano ban bah khlieh ha kaba iadei bad ka jinglong jingman ka jong u mynta. Ki doctor kiba leh ia kane ka surgery (ne puid) kidei ban bah khlieh halor kane ka jingleh thurmur bad bym shimkhia haba sumar nongpang,” ong kiba ha iing u Atikur.
Kane kam shym la dei ka sien ba nyngkong, kum kine ki jingjia la ju jia ruh ha kiwei pat ki bynta jong ka jylla.
