Shillong Naitung 03: U Myntri ka tnad Bording u AT Mondal ula kyntait ban thung ia ka kynhun tohkit kaba laitluid halor ka jingkynnoh ba ka don ka jingpynkiew kynsan kaba khlem nongrim ia ka jinglut jingsep jongka Ganol Small Hydro Project kaba 22.5 Megawatt.
U nongialam ka Liang Pyrshah u Mukul Sangma, ula kyrpad ban thung ia ka kynhun tohkit da kaba pynpaw ba ka sorkar kala dep ban khmih biang ia ka jinglut jingsep jong katei ka project kaba la long bun shah bad lam shaduh sha ka jingpynkiew ia ka dor na ka T.356.43 sha ka T.590.88 Klur, hynrei u Mondal ula ong ba ym donkam satia ia katei.
Haba iakren bad ki nongthoh khubor ha ka sngi Palei, u Mondal ula ong, “Ka jingpynkiew dor ia katei ka projek kam dei satia ka bym ju jia koit na ka bynta ki
Hydro Power Project bad ia katei ka jinglut jingsep kadei kaba la khmih da ka IIT Guwahati bad kaba la Audit ruh da ka kynhun kaba la ithuh da ka AG”.
Ka Kynhun Myntri kala shim ia ka rai ban khang noh ia katei ka projek, da kaba shim ba ka jinglong jingman kaba mynta bad ki mat kiban sa mih hadien habud.
“La bunsien ha kiba bun ki projek pynmih bording ka ju don ka jingpynkiew ia ka dor jongka jinglut jingsep bad kaei ka jinglut jingsep kaba la leh, kadei kaba la phah bad khmih bniah da ka IIT Guwahati. Ka kynhun kaba la ithuh da ka AG kala Audit ia ka jingkhein jingdiah bad kumta ka kynhun myntri kala shim ia ka rai ban khang noh ia ka Ganol Project namar ba mynta kala pynmih (bording). Lada ngi ieh sah, kumta bun ki mat kin sa nang iai mih, kumta la khang noh lyngba katei ka jingai jingkhein” la ong u Myntri Sorkar.
Halor ki daw ha kaba iadei bad ka jingpynkiew ia ka dor, u Mondal ula ong, ba kadei namar ka jingpynkylla dur ia ka Design jong ka project. Ha kaba nyngkong la pynwandur kum ka ‘Surface-Type Channel, hynrei ka CWC hadien kala ai jingbthah ban don ia ka Underground Tunnel. Kane ka jingpynkylla kala lam sha ka jingkiew dor kynthup ia kito ki jingmih kynsan ia ka jinglong jingman jong ka sawdong sawkun.
“Mynshwa la rai ban leh kum ka Surface Type Channel ban shim ia ka um sha ki Turbines hynrei syndet syndet ka CWC kala ong ba dei ban leh da ka Underground Tunnel. Kumta lada leh da ka Underground Tunnel ka lah ban don ka jingmih kynsan kiei kiei kiba long syndet jong ka sawdong sawkun jong ka jaka” ula bynrap.
Haba kylli la ka don kino kino ki kot ki sla ha kaba iadei bad katei ka kam, u Mondal ula ong, ba ym don eiei ban buhrieh, namar ba ka jingkiew dor katei ka projek kadei kaba la khmih bniah bad kaba la leh ruh ia ka Audit.
Ula banjur ba watla kala don ka jingpynkiew ia ka dor, hynrei kane ka projek kan ai jingmyntoi ia ka jylla.
