Shillong, Jylliew 15: U Myntri ka Tnad Arts & Culture Bah Sanbor Shullai ula bthah ia ka Tnad Arts & Culture ba kan aiti noh ia ka Ampitheatre kaba don ha Moolasyat, Jowai sha ka Dorbar Shnong Mihmyntdu bad ka Jaiñtia Students Union (JSU) namar ka jingbym lah ban pyndonkam mynta la palat 5 snem.
Kane ka jingbthah kala mih hadien ka jingjurip ia kane ka jingtei (Ampitheatre) myn ha ka 14 tarik Jylliew halor ka jingshem ba bun ki bynta jong kane ka jingtei kala shu julor kai tang namar ka jingbym pyndonkam ia ka.
Ia kane ka Ampitheatre la dep ban shna naduh u snem 2017 ha Moolasyat hynrei ka Tnad Arts & Culture kam shym la lah satia banpyndonkam satia ia kane ka jaka haduh kine ki sngi ba mynta.
“Kane ka pyni ba dei ka jingpulom treikam jong ka Tnad Arts & Culture ba kam shym la pyndonkam ia kane ka jingtei kaba la iaid mynta la 5 snem bad bym ailad ruh ia kiwei ba kin pyndonkam” ong u Bah Sanbor.
“Ka jingshna ia ka Ampitheatre ka dei na ka bynta I paidbah ba kin ioh pyndonkam hynrei kaba sngewsih ba ia kane ka jaka la shu khang tala beit haduh ba ki jingkhang kila pyut bad ki Iit kila pait lut” bynrap u Myntri.
U Myntri ula bthah ia ka Tnad ba ka dei ban plie noh ia kane ka Amitheatre lem kumta kan hap ban aiti noh sha ka Dorbar Shnong bad ka JSU ba kin pyniaid, ka ban long da ka jingiateh soskular.
U Bah Sanbor ula ther tyngeh ia ki Ophisar ka Tnad halor ka jingbym pyntip sha u halor ka jinglong jingman ne ka jingbym plie ia kane ka jaka tad haduh da lap hi dalade da ka jingujor jong ka Dorbar Shnong bad ka JSU.
“Ngan khot hajir ia ki ophisar halor ka jingkhang khyrdep ka jongki ia ka Ampitheatre mynta la 5 snem kynthih bad balei kim shim la pyntip eiei ia nga kum u Myntri Sorkar bad ka don aiu sha lyndet bad balei ki sheptieng bad nga tip ia kine kiei kiei lyngba ka Dorbar Shnong bad sengbhalang” ong u Bah Sanbor Shullai.
