Shillong, Jylliew 30: Hapdeng ka jingleitkai sngewbha ha ka Sngi U Blei, ka la wanrah ka jingjia ba sngewsih ha kaba kawei ka kynhun ki samla kiba wankai da kawei ka kali kaba la pynher stet bha, ka la iakynduh ia ka jingjia aksiden kaba shyrkhei ha surok Umsning Bypass hajan Umkaliar ha ka por kumba 5 PM janmiet.
Lah ban kdew ba watla ki Pulit ka Ri Bhoi ki la pyrshang bunsien ban pynsngewthuh shaphang ka jingma kaba lah ban mih na ka jingpynher stet palat bad ka jingniah kali khlem da pyrkhat, khamtam eh ki samla kiba niah bike, hynrei kum kine ki jingmaham kim shym la rung atia ha ki tyndong shkor jong ki samla.
Wat la ki pulit ki la dain kuna ia bun ngut ki ba niah kali kynthup ki kali saw shaa bad arshaka bad ki la pynlong ruh ïa ki jingpynsngewthuh paidbah, hynrei ki nongniah kali kiba kwah leh khyllah ne stunt, ki dang iai pynkhein iaki jingmana ki Pulit kaba la wanrah ka jingeh ha surok bah National Highway 6.
Ki nongleit nongwan ba man ka por ha ka surok bah NH-6 ki la pynpaw ïa ka jingsngewkhia kaba jur halor ka jingbun ki samla, khamtam eh kiba don hapdeng ka rta kaba 18 bad 20 snem, kiba ju pyndonkam ïa ki surok hapdeng ka Umran, Sumer, bad ka Umsning Bypass kum ka jaka niah kali khyllah (stunt) kaba buh jingma iaki ba pyndonkam iaka National Highway.
Ha ka janmiet jong ka Sngi U Blei, ki nongsakhi ki la ïathuh ba ka kynhun jong ki nongñiah bike ki la pynlong ka jingia pynher sted bad leh stunt ha ka surok bah ha ka por 5 baje janmiet bad hapdeng kane, kawei ka kali Maruti Ignis kaba don ia u nombar ML 05W 7020, kaba la niah da uwei u samla bad kaba kit lai ngut kiwei pat ki nongshong kali, kala kylla baji namar ka jingpynher sted palat.
U nongniah jong kane ka kali bad uwei u nongshong kali ki la mynsaw katba arngut kiwei pat ki la phet krad noh na katei ka jaka.
Mar ïa ïoh jingtip ïa kane, ki Pulit ka Umsning ha ryngkat ki kali Ambulance 108 ki la poi sha katei ka jaka bad pynkit noh ïa kine ki briew kiba mynsaw sha Umsning CHC Hospital.
Ka jingtohkit halor kane ka jingjia ka dang ïaid mynta wat haba ki bor synshar ki la pynpaw biang ïa ka jingdonkam ban niah kali da ka jingkitkhlieh bad ki la kyntu ïa ki kmie ki kpa bad ki paidbah ba kin ïarap tehlakam lem ïa ka jingia niah kali khyllah ha ki surok National Highway.
