Shillong, Jylliew 29 : U Myntri Rangbahduh ka ri u Narendra Modi ha ka jingiashimbynta ha ka Episode kaba 123 jong ka Mann Ki Baat, kaba la pyni hynne ka sngi, ula kren kyrpang shaphang ka jain Ryndia ka jylla Meghalaya, kaba la ioh dang shen ia ka shap ne Geographical Indication (GI) Tag.
Haba ai jingithuh ia ka jingriewspah ka ri India ha kaba iadei bad ka Arts, Crafts bad ka jingstad bad jingtbit ki trai riewlum, u Myntri Rangbahduh ula banjur ba kumno man la ka thain jong ka ri, ka rah iala ka jongka jinglong tynrai lyngba ki tiar kiba ki pynmih. Napdeng kitei, ka jain Ryndia jong ka Meghalaya ka ieng kum ka shap jongka jingpynneh pynsah, ka riti dustur tynrai bad ka kam thain jingthain.
“Ka Ryndia kam dei tang ka jain, hynrei kadei ka spah bah jong ka Meghalaya, kaba la pynneh pynsah da ka jingieid bad la nang kyntiew ia ka katba nang mih ki pateng khamtam eh da ki paid Khasi” la ong u Myntri Rangbahduh ka ri.
Ula pynpaw ia ka rukom pynmih ia kane ka jain, ia kaba ym donkam ban iaid da ka lynti jong ka jingiaumsnam bad kala ioh ia ka nam Ahimsa Silk, namar ia ki Niangryndia ym shim la pynthud eiei ia ki . Ula ong, “Mynta ka jingdawa ia kitei ki mar kala kiew bha ha kylleng ka pyrthei kaba ym kynthup ia ka jingiaumsnam bad kaba ym don ruh ia kano kano ka jingma ia ka mariang, kumta ka jain Ryndia na Meghalaya kadei ka mar kaba biang tam ban pyniaid iew ha kylleng kane ka pyrthei.
U Myntri Rangbahduh ula iaroh ia ka jingkiew ka jingdawa hapoh ka iew ia ki mar kiba don jingiadei bad ka mariang bad pynpaw ia ka jingskhem jingmut ba ka don ha ka bynta kaba biang bha ban pyndap ia kitei ki jingdawa.
“Kane ka jain ka pynsyaid ha ka por lyiur bad ka pyn pynngad haka por lyiur, kaba pynlong ia ka kaba biang na ka bynta kano kano ka aiom bad donkam ban pyniar ia kane hapoh ka National bad bad ki iew ha kylleng ki ri” ula ong.
U Modi ula iaroh ruh ia ki longkmie kiba la ialam nakhmat ia ka lynti ban thaw ia ki Self Help Group ban kyntiew ia ka jingpynmih, ban pynneh pynsah ia ktei ka rukom thain bad ban thaw ia ki lad ban ioh kamai kajih.
Haba kyntu ia ka ri ban pdiang ia ka Khadi, ki jingthain da ki kti, u Myntri Rangbahduh ka ri ula iengskhem ia ka mynsiem ban pynsawa na ka bynta ki trai shnong “Vocal for Local” bad Atmanirbhar Bharat Abhiyan.
“Lada ki nongthied ki thied tang kawei ka mar kaba la shna hapoh ri India bad ki nongkhaii ki die tang kawei ka mar kaba la shna hapoh ka ri India, kane ka jingiakhun ka ri India ban long kaba shaniah hi halade kan nang kiew shaphrang”.
Ha ka episode kaba 123 jong ka Mann Ki Baat kala bteng ban pyni ia ka jingthrang bad ia ka jingshaniah halade bad ka ri India kaba la ngam ha ka kolshor. Kaba pyni ia ki khana jong ka jingsngewsarong, ka jingiai shah bad ka jingkiew ha kylleng ki bynta jong ka ri.
Haba pynpaw ia ka jingsngew halor ka Mann Ki Baat, u Myntri Rangbah ka jylla u Conrad K Sangma ula pynpaw ia ka jingsngwnguh ia u Myntri Ragbahduh ka ri u Narendra Modi uba la pynshlur ia ki nongthain jain ka jylla da kaba kren ha ka rynsan jong ka ri.
U Conrad K Sangma, ula thoh ha ka X Ka jongu, “U Myntri Rangbahduh ka ri
@narendramodi ha ka #mannkibaat2025 ula kren bad kdew shaphang ka jingioh ka Megahlaya dang shen ia ka GI Tag ha kaba iadei bad ka Rydia bad ula khot ruh ia ka ‘Ahimsa Silk’ halor ka jingbym don kano kano ka jingleh bein bad ka rukom pynmih kaba long tynrai. Ka jingai mynsiem ka long kaba khraw ia ki nongthain jain tynrai ki jong ngi. Khublei shibun Myntri Rangbahduh”.
 Tag.){kind=link}