Shillong, Jylliew 27 : Ka Iingkashari High Court ha ka sngi Thohdieng, kala pdiang ban tian bishar ia ka mukotduma Public Interest Litigation (PIL) bala mudui da ka Syngkhong Rympei Thymmai (SRT), ba tynjuh ia ka jingai Scheduled Tribe Certificate da ka Tnad Social Welfare.
Kane ka Society ka kynthup ia ki dkhot jong ki Jaidbynriew Khasi, kaba don ia ka Ophis bala register ha Madan Laban, East Khasi Hills, Shillong.
Ka mat ba kongsan ha kane ka mukotduma ka dei ka jingai Scheduled Tribe Certificate sha ki Khasi kiba ai jait la ka dei sha u Kpa ne ka Kmie, sha ka kynthei bym dei ka Khasi kaba jied ban shim ia ka jait u Kurim.
Haba pdiang ia ka PIL, ka Division Bench ba kynthup ia u Chief Justice IP Mukerji bad Justice W Diengdoh ha ka hukum, kala bthah ia ka Tnad District Council Affairs (DCA) ba kan file ia ka report halor kane ka kam.
“Ha ka sngi wanrah ia ka mukotduma, ka Tnad District Council Affairs ka dei ban file ia ka report ha kane ka Iingkashari ba dei bad ka jingai lane ka jingpynpaw halor ka jingai ST Certificate ia ki Khasi kiba jied ban shim ia ka jait Kpa ne Kmie bad sha ka Kynthei kaba jied ban shim ia ka jait u Kurim” kala ong.
Ka Iingkashari kala shimkhia ba ka Khasi Hills Autonomous District (Khasi Social Custom of Lineage) Act, 1997, ka treikam sha baroh ki Khasi ha Khasi Hills District bad buh ban register bad ai ia ka Khasi Tribe Certificate.
Hynrei, ka Iingkashari ka pynpaw ia ka jingkwah ban sngewthuh ba kiei ki lynti ia u briew ban shim ia ka jait Kmie lane Kpa ka lah ban pynkylla ia ka jingkitkhlieh jong ka Bor treikam hapoh kane ka Ain ba kin register kum ki Khasi bad ai ha u ne ka, ia ka ‘Tribe Certificate”.
Ka Iingkashari kala bthah ia ka nongmudui ban phah copy ia ka mudui sha baroh ki liang mamla lait noh ka Jylla, kaba la mihkhmat da u nongiasaid.
Ka SRT kala pynpaw ba ha ka 21 tarik Naitung, 2020, la pyntip sha ka Deputy Commissioner, East Khasi Hills da kaba pynskhem ïa ka jingai jingmut ba la ïoh na ka tnad District Council Affairs ba ka Lineage Act, 1997 kam shym la khang ban ai ïa ST Certificate sha kito kiba aplai kiba shim ia ka Jait la ka dei na u Kpa ne ka Kmie bad ka rukom shim kyrteng Tnga da ka Kurim ka bym dei ka Khasi”.
Da ka jingpyntip kaba hadien ha ka 21 tarik u Naitung, 2024, katei kajuh ka tnad Social Welfare ka la weng noh ïa ka shithi ba 21 tarik u Jylliew, 2020, kynthup ïa ka rai kaba don ha ka. Ka nongujor lyngba u nongiasaid ain jong ka ka la pynpaw ba namar kane ka jingpyntip, ka jingai syrnod Scheduled Tribe sha ki Khasi ka la shah pynsangeh noh ha ka sorkar.
 bala mudui da ka Syngkhong Rympei Thymmai (SRT), ba tynjuh ia ka jingai Scheduled Tribe Certificate da ka Tnad Social Welfare.){kind=link}