Shillong, Jylliew 25 : Ka jingiakynad kaba jur kala kyan biang sa shisien ha ka shnong Lapangap, West Jaintia Hills-hapdeng ki paid Khasi-Pnar bad ki Karbi. Kane ka jingiakynad kala mih na ka jingkynnoh kyntur pud ki paid Karbi ha Loom Pynthor, ka jaka kaba hap hapoh ka jingkhmih jong ka shnong Lapangap.
Kane ka jingiakynad kala khie biang ha ka step sngi Balang. Kat kum ka khubor ba ioh lum, la kynnoh ba ki paid Karbi kila wan thung jingthung bad shna Iing ha une u lum ha kine ki arsngi laisngi bala leit noh bad kila leh ia kane ka kam khlem da ioh jingbit na ka Dorbar Shnong Lapangap.
Haba ioh jingtip halor kane, ka Seng Khasi Students Union West Jaintia Hills bad ka FKJGP West Jaintia Hills, kila hiar sha Lapangap bad ha ryngkat u paidbah nongshongshnong, kila leitpynpra ia kine ki iing ba dang sdang shna bad jynrat ruh ia ki jingthung jingtep ha une u Lum.
Ki nongshongshnong ka Lapangap kila kam ba ka Loom Pynthor ka dei kaba long trai bad khmih da ka shnong Lapangap.
Kat kum ka khubor bala ioh, la iathuh ba ki Pulit ka Assam kila wan ban tuklar ia kane ka jingjia bad kila siat tear gas sha ki paidbah ba kin phet na kane ka jaka.
Hynrei hadien katto katne por, na ka liang ka Sorkar Meghalaya kala phah ia u Border Magistrate lem bad ka kynhun ki Pulit sha kane ka jaka ban peitthuh ia ka jinglong jingman bad ban tehlakam ia ka shongsuk shongsain ha ka thain.
Kat kum ka khubor ba dang shu ioh, la iathuh ba ki paid Karbi kila sdang ban ialum briew ha ki shnong ba markhap ka Loom Pynthor khamtam ha Tahpat.
Lah ban pynkynmaw ba dang ha u bnai Nailur, 2023, ka jingiakynad kaba jur kala mih hapdeng ki paid Karbi bad ki Khasi-Pnar ha Lapangap.
Kane ka jingiakynad kala poi ruh sha u pud ka jingialeh thma siat jri bad siat khnam ryntieh hapdeng kine ki arkynhun bad lam ruh sha ka jingmynsaw ki katto katne ngut.
Ha une u snem, ka jingiakynad kala mih tang namr ka jingleit thung symbai dieng ki paid Khasi-Pnar ha Loom Moopyrdet bad Loom Pdeinphniar kaba hap ha Lapangap.
Ka jingiakynad kala jur bha haduh ba ki Pulit na Meghalaya bad Assam kila hap ban synran ia ki nongrep ba kin leit ot kba bad kiwei kiwei ki marrep.
