Shillong, Nailur 06: Ka Jylla Meghalaya hynne ka sngi ba-ar kala ioh haduh T. 86.08 klur, kaba dei ka installment jong u bnai ba hynriew jong ka Post Devolution Revenue Dificit (PDRF) Grant.
Ka Sorkar Pdeng kala pyllait haduh T. 516.50 klur ka PDRD Grant sha ka Jylla jong u snem 2022-2023.
Ka Department of Expenditure, Ministry of Finance hynne ka sngi ba-ar kala pyllait ia ka instalment jong u bnai ba hynriew ka PDRD Grant ba kot T. 7183.42 klur sha ki 14 tylli ki Jylla ka Ri. Ia kane ka grant la pyllait kat kum ka jingai jingmut jong ka Fifeteenth Finance Commission.
Ka Fifteenth Finance Commission kala ai jingmynjur ia ka Post Devolution Revenue Grant ba kot T. 86,201 klur sha ki 14 tylli ki Jylla na ka bynta u snem mang tyngka 2022-2023.
Ia kane ka song pisa la pyllait da ka Department of Expenditure sha ki Jylla bala ai jingmynjur ka Commission da ka instalment ba 12 bnai.
Da kane ka jingpyllait ia ka instalment ba hynriew jong u bnai Nailur 2022, ka Revenue Dificit Grant baroh lang bala pyllait sha ki Jylla ha u snem 2022-2023 kala kiew sha ka T. 43,100.50 klur.
Iaka Post Devolution Revenue Deficit Grants la ai sha ki Jylla kat kum ka Article 275 jong ka Riti Synshar ka Ri. Ia kane ka song pisa la pyllait sha ki Jylla kat kum ki jingai jingmut jong ki Finance Commission bapher bapher ban lah pyndap ia ka Revenue Account jong ki Jylla.
Ki Jylla kiba ioh ia kane ka Post Devolution Revenue Deficit Grant jong u snem 2022-23 ki kynthup ia ka Andhra Pradesh, Assam, Himachal Pradesh, Kerala, Manipur, Meghalaya, Mizoram, Nagaland, Punjab, Rajasthan, Sikkim, Tripura, Uttarakhand bad West Bengal.
