Shillong, Jylliew 23 : U Symbud Myntri Rangbah ka Jylla Bah Prestone Tynsong ha ka sngi Nyngkong, ula bthah ia ka Liang Pyrshah Voice of the People Party (VPP) ba kan wad ia ka jingshisha ha ka jaka ban shu kynnoh lamwit pyrshah ia ka Sorkar Jylla bad ia ki jingpyrshang jong ka ban wanrah ia ka roi ka par hapoh ka Jylla.
Haba iakren bad ki nongthoh khubor, u Bah Prestone ula iathuh ba ka VPP kala kynnoh ba kam don satia kano kano ka jingphoida wat hapdeng ka jingpynlut jong ka Sorkar da ki klur tyngka khlem da wad ia ka jingshisha.
Kat kum ka jingong jong u, ki don shibun ki jingmyntoi ha man ki kam, kiba ka Sorkar kala kynshew.
“Kumta, nga kyrpad ia kane ka seng sain pyrthei (VPP), nga tharai ka dei ruh ka kamram jong ki ban wad ia ka jingshisha….ki lah ban leit sha ki shnong ki thaw bad wad ia ka jingshisha haba iadei bad ki jingkynshew jong ka Sorkar, ban lap ka kiba seisoh ne em, la ki dei kiba ai jingmyntoi ne bym phoida” ula ong.
“Ka dei ka kamram jong ki ban leh ia kata. Ai ba kin leit. Wat nang tang ban shong ha Ophis bad shu kynnoh mat lah kumto, ka bha ba phin leit hi dalade bad peit ha ki shnong ki thaw, ynda phi la iohi dala ki khmat phii lah ban kynthoh ba ym don eiei bad dei tang ki jingkam suda da ka Sorkar” ong u bah Prestone.
“Namar kata, nga bthah ia kane ka seng sain pyrthei ne ia kino kino ki seng sain pyrthei ba lada kim sngewhun, khie leit sha ki shnong ki thaw phin sa iohi ia ki jingshisha namar ia mynta ki briew ha man ki kam ba ki trei ia kiba ngi la kynshew ha baroh kine ki snem, nga tharai ngi la iohi ia u soh na ki” ula bynrap.
 ba kan wad ia ka jingshisha ha ka jaka ban shu kynnoh lamwit pyrshah ia ka Sorkar Jylla bad ia ki jingpyrshang jong ka ban wanrah ia ka roi ka par hapoh ka Jylla.){kind=link}